公仔箱高層「數字小姐」一向至鍾意出風頭，當正自己係明星咁款，呢期佢至興帶啲仔仔女女出席活動，一來自己有得影相曝光之餘，仲可以話畀大家聽，邊個仔女係佢嘅愛將。
不過數字小姐管教無方，一班仔女唔知係咪因為得寵學壞晒，不約而同養成一個壞習慣，就係鍾意遲到嘞。
首映禮失威
早排數字小姐率領「渣斗舞王」同「少爺仔」幾位愛將睇首映，片中男、女主角「阿產」同影后「豬皮」超準時到場，但嗰班公仔箱哥仔渣斗舞王同少爺仔就派頭十足，居然比影后遲到大半個鐘，所以觀眾一早就入晒場，搞到幾乎全院滿座。
一早到場嘅嘉賓坐喺度印印腳等熄燈，少爺仔同渣斗舞王就戇居居、盲舂舂搵位，最後仲要各散東西分開坐，真係尷尬到暈。有得睇同場加演趣劇「盲頭烏蠅四圍舂」，入場觀眾都算有眼福啦。
Textby關仁
