女神童何凱琳事忙，噚日唔可以同小學師妹去瑪麗醫院探全身癱瘓嘅鄧紹斌，不過佢醫者父母心，預先錄咗一段鼓勵阿斌嘅說話，由小學母校元朗朗屏邨惠州學校幾位小師妹代為傳達。
凱琳話好多人都面對困難，但都鍥而不捨去解決，好多人想生存都冇得揀，阿斌仍然生存，更可以寫書出版，證明可以做到好多嘢，所以應該珍惜生命同珍惜身邊嘅人，因為身邊嘅人可以為自己帶來能量。
要求安樂死嘅阿斌早知凱琳大名，聽完凱琳鼓勵佢一番話後有微笑同點頭，唔知係咪內容太「行」，只係回應咗一句「我知道喇。」阿斌卧床多年，應該參透生死，神童智慧高到可以領悟佢嘅睇法？