記者公司位於將軍澳工業區，秋風吹來，帶來鄰近堆填區一陣「芳香」，教人精神一振！跟環保人士聚餐順道抱怨。「沒法子，堆填區有1/3的固體廢物，來自香港人吃剩的食物。」對方一瞥我剩下一半的炒飯道。記者當頭棒喝，腦中閃過「誰知盤中餐，粒粒皆辛苦」。發現剛過去的周三為全城首個「少飯平$1日」，將功補過，積極參與。另外更有餐廳自發性鼓勵食晒獎$1，唔要甜品平$5等。老套講句，錢為次要，環保最緊要！
記者：馮冠芝
攝影：陳陶鈞、陳偉強、楊錦文
模特兒：Chloe、Diane
宣揚有衣食 奧海城
最初發起「無膠袋日」的綠領行動今次再下一城，與奧海城11間食肆合作，實行「少飯平$1日」。每月第1個星期三，在指定餐廳，只要落「柯打」時叫聲「少飯」，餐廳自動減白飯1/3，食客就可畀少$1。
叫聲少飯就能環保固然係好，但啲飯到底少成點？如果唔夠飽就唔係咁好啦！記者數學不好，減咗1/3都唔知實質少幾多，最簡單就係攞隻家庭必備的飯碗，實行「少飯日份量大測試」！記者率先前往參與活動的「麻酸樂米線專門店」，叫咗兩客皇牌雞翼飯，1客為少飯，用個碗一量下，結果發現平$1少成一半飯！但其實對大部份女生來說，才是剛剛好的份量。有衣食又慳錢，簡直是雙贏。
麻煩嘥錢都照搞
少幾多都係得個「知」字，畢竟食肆通常有一個標準的鐵杓，一杓一碟飯。現在實行少飯又要每碟減番啲，落單又多一項，行政費絕對及米貴，雖然老套，「麻酸樂」經理王秀婷還是要說：「我們都是盡社會責任。」此外，針對香港人貪新鮮多心的性格，餐廳更推出「迷你餐」，有飯有米線，每份份量是平時的1/3，再加上一口甜品。價錢與標準餐一樣，但可以試幾款食物又唔使浪費，正！
皇牌雞翼飯$24
標準碟頭飯填滿一碗後仲有半碟剩，真係多飯到嚇人一跳！「怪唔得平時都食唔晒。」
迷你餐$42（包熱飲）
小小迷你餐卻一次過滿足你N種口味，包括鎮江排骨飯、手撕雞米線及一口芝士蛋糕，每樣少少哋食得「知」味！
麻酸樂米線專門店（28270707）
奧海城2期地下G36-37號舖
開細唔止OL
1成人參與
原以為OL食量小，會成為「少飯平$1」最大粉絲，但記者走訪奧海城商場其中3間參與的食肆，包括麻酸樂米線專門店、@mpm及魚米家魚湯米線大王，發現叫「少飯」的顧客來自各階層。由於是次活動為首次舉辦，大部份食客都不知道有此活動，每間食肆平均約有1成客人參與。
多冰醒$1食晒獎$1 姨媽姑姐
「少飯平$1」剛剛推出，食客反應還不算太熱烈。除了因為很多食客還未得悉此活動外，更重要是香港地，好多食肆其實「無飯食」！有見及此，「姨媽姑姐」決定於「少飯平$1」同日搞搞新意思，就是掉轉頭多冰醒你$1。咦，好似同「有衣食」無關喎！老闆姑姐一句：「多冰無咁甜，可以健康啲，睇少啲醫生，減少醫療廢物。」咁都得？
咁都未止，小記質疑「多冰計劃」未夠環保，姑姐獎多一項，就係食得亁亁淨淨獎你$1！「中國山區小童無嘢食，所以我哋都要有衣食唔浪費，食唔晒就同朋友分享好過嘥。」
粟米汁炸雞翼意粉拼黑椒汁醬爆豬柳條飯
$42起（DIY焗飯自選配搭）
兩種滋味，一啖意粉一啖飯，粟米汁甜，醬爆汁惹味，各具特色。食晒仲畀番$1你㖭。大胃王有So！
唔話你知 $22
名字特別，其實是每次老闆都唔話你知佢會整杯咩畀你飲咁解！但今次就係由濃士多啤梨汁及菠蘿乳酸調配的飲品，配上多冰夠清凉，爽！
姨媽姑姐（28381985）
銅鑼灣登龍街32號
學生價唔要甜品減$5 葵樹坊
位於元朗，開張只有個半月的「葵樹坊」，既注重環保亦關注學生健康。該餐廳推出的學生午餐有餐湯、包、主菜、餐飲，再來雪糕夾餅當甜品，對中學女生來說可能太多，因應食量，現在逢星期一至五提出「唔要甜品」，成個餐就可平$5，體貼又唔浪費。（只限中、小學生，憑學生證或穿校服者）
平開有條路，老闆決定逢星期一，憑是日此報道於該餐廳晚餐惠顧滿$200，即送價值$45的火燄雪山！
白酒忌廉汁煎石斑雜菜薯餅配薯菜 學生餐$30（未包甜品）
餐湯天天不同，是日為新鮮薯茸南瓜忌廉湯，香甜美味。主菜薯餅煎得香脆，魚柳鮮而不腥。再配上足夠份量的蔬菜，健康好食。
白菌汁豬扒法蘭克福腸配雜菜炒飯 學生餐$30（未包甜品）
豬扒腍口不膩，炒飯有紅蘿蔔、菜粒等，配上香濃的白菌汁，十分美味。
火燄雪山$45
蛋白經火燄略燒，外脆香內軟腍，更有淡淡酒香，齒頰留香。
葵樹坊
（24746868）
元朗大棠路48A-K昌發大廈8-9號舖
