一代歌王巴伐洛堤（LucianoPavarotti）與世長辭，全球歌迷同聲一哭，當中包括本港知名裁縫店Sam'sTailor嘅Sam師傅。佢好傷感咁同八方講：「我哋一班師傅都好傷心，因為冇咗位大客。」佢話歌王每次來港都會訂做幾十件西裝、禮服同襯衣，有時更會越洋落柯打，十分大手筆。
吸引到歌王遠渡重洋嚟香港做衫，Sam師傅話有兩絕招，「香港師傅聽話、手腳快，世界馳名。」佢同八方講，歌王唱功非凡，對時裝設計都有獨到品味，意大利冇師傅服侍得佢滿意。Sam師傅多名人客仔，平時好口密唔透露客人私隱，噚日難得吐露歌王歌衫背後傳奇。「你有冇留意佢上台着嘅襯衣有咩特別？」
獨門設計背脊鈕扣
八方睇番歌王舊照，歌王登台時經常舉起雙臂高歌，突出個大肚腩運氣，件襯衣雪白筆直，驟眼睇唔出有咩機關喎！Sam師傅慢慢解釋，「其實佢嘅襯衣前面唔使鈕扣，一排鈕扣全部喺背脊。」佢繼續講，「佢只要一伸雙手，穿上一對袖就着好件衫，助手會幫佢扣好背脊嘅鈕，咁佢就可以迅速走到台前。」
歌王呢個獨門設計，目的係方便佢喺後台快速換衫，Sam師傅話，佢做咗幾十年衫都冇諗過可以喺背脊扣鈕，歌王諗得出，確係世間一絕！除咗獨家設計考師傅功力外，Sam師傅仲要滿足到歌王另外兩個願望。「佢最鍾意中國絲綢，覺得好柔軟好舒服，又鍾意用珍珠做鈕扣，覺得夠高貴，我哋每次都會為佢準備呢兩種材料做衫。」歌王品味確係不同凡響，咁一套衫咪好貴？佢唔肯透露價錢，總之一般人都買得起佢哋嘅出品，度身訂做西裝由5,000蚊起到2.8萬蚊一套，豐儉由人。
Sam'sTailor開業足半世紀，名人明星客仔多不勝數，美國總統布殊、NBA球星姚明都有幫襯，三年前更被《時代》周刊選為亞洲最佳西服店。揸fit人阿Sam來頭都唔簡單，佢係印裔人，本名ManuMelwani，中文名叫麥文浩，今年55歲，早年繼承父業成為第二代阿Sam，02年獲頒金紫荊星章。八方問佢成功之道，佢學劉華咁答：「我哋用誠懇和專業嘅態度待人，客人自然買得開心又放心。」