現年19歲嘅人氣少男殺手「動漫Maggie」李曼筠，憑酷似蔡卓妍（阿Sa）嘅面孔以及33C豐滿上圍，成為呢期商場騷寵兒。聽聞佢行泳衣騷收10,000蚊，出席一般活動就收4,000左右，噚日佢就以嫦娥造型到尖沙嘴出席中秋節活動，計計埋埋佢今個暑假都搵成十萬八萬，認真後生可畏。
狂煲電話粥
雖然搵埋唔少，但Maggie原來係個慳妹，坐巴士多過坐的士。好似前日佢喺尖沙嘴同將軍澳美亞集團中心做嘢，佢先喺將軍澳坐廠車到坑口地鐵站，轉搭$8.2票價嘅98D巴士直出尖沙嘴，車程約半個鐘，做完嘢後再轉乘271巴士，車資$9.1，坐足一個鐘至返到大埔富亨邨寓所，即係坐兩程車加埋都唔使18蚊。
呢位富亨邨之花自從早幾日俾人影到住公屋後，除咗坐巴士時勁煲電話粥外，佢全程都好小心，最搞笑係佢特登早幾個站落車，喺大埔中心不停兜路，唔知佢係咪怕遇上傳媒呢？
結果Maggie兜足30分鐘至返屋企，話時話，佢都算好深閨，做完嘢多數即刻返屋企，雖然屋仔細細，面積約300呎，但佢都幾享受同家人一齊嘅時間，就算同13歲嘅細佬分享50呎房仔，都一樣咁開心。
