舊年，國航（753）同國泰（293）可以講係大陸航空集團第一次同「外人通婚」。今個月初，東航（670）引入新加坡航空同淡馬錫做策略股東，天空上又多一樁中外聯婚喜事。噚日見到國泰主席白紀圖，梗係問吓佢新婚生活點？
點知白主席第一時間搶住話，今日只係講呢個活動，其他嘅唔答，OK，開始問問題……（全場鴉雀無聲）。
活動主辦機構負責人JohnWood忍唔住潤咗白主席一句：「好明顯大家係為你而嚟！」淨係准講活動，咁個活動講乜㗎？
原來國泰sponsor咗個叫LiteracyOne（L1）嘅活動，佢哋會喺年底，由美國空運40萬本書嚟香港，之後再將啲書分發到亞洲其他地區。哦，講書！華華知道白紀圖好鍾意睇書、屋企藏書超過5000本，咁白主席細個嗰陣鍾意睇乜嘢書？咪係《Swallows&Amazons》，作者係ArthurRansome。點解？「呢本書好適合小朋友，講歷險故事，我8歲嘅時候睇，好鍾意。」
咁瘋魔全球大人細路嘅《HarryPotter》呢？「無睇過噃！」