梁朝偉在《色，戒》中與湯唯瞓身肉搏，房祖名在高原天然生曬靚股，兩人同獲提名本屆威尼斯影帝，揚威海外。由甫出道拍《千機變》被喪插致自信盡失，到拍第三部戲即獲提名影帝，祖名揚言：「如果仲有人話我唔得，我真係冇嘢好講！」
房祖名在姜文執導電影《太陽照常升起》裏飾演鄉村裏的小隊長，遇上下放的姜文夫婦，還給姜文的老婆孔維看上了，自始沉溺於肉慾關係。談到兩人一場「禁室培慾」，祖名仍然面紅：「我飾演嘅角色係十幾歲，佢就係一個廿幾歲嘅女人，見到我咁單純咁可愛，於是勾引我。拍親熱戲嗰陣大家都好尷尬，雖然成個過程係用聲音交代，但我哋都好想快啲搞掂佢。」
13歲暗戀大姐姐
祖名13歲那年也曾愛上年齡比自己大的異性，對方是母親朋友的女兒，他說：「佢大我7年，我寫信畀佢，又整小禮物，後嚟佢都知我鍾意佢，不過冇因為咁避開我，仍然好似家姐咁對我。」
除了處男下海拍性愛鏡頭外，祖名還全裸上陣登高晒股，結果犧牲有價，獲提名威尼斯影帝，他說：「今次係我第一次角逐影帝，仲係威尼斯電影節，香港冇乜幾多個資歷淺嘅新人做到，我覺得幫新一代電影人出番啖氣，證明我哋有用心去做！」他再次強調：「《太陽照常升起》係我第三部戲，已經去到威尼斯，如果仲有人話我唔得，我真係冇嘢好講！」
Fiona未到頂要努力
龍之子首部戲《千機變》便當主角，樹大自然招風，祖名說：「嗰陣有啲人好針對我，話我唔識做戲，到第二部戲《早熟》就好少少。我同自己講要努力去做，但唔係好有信心，好彩後嚟有姜文同爾冬陞（《早熟》導演）肯定我，𠵱家再冇人可以摧毀我嘅信心！」
祖名與薛凱琪（Fiona）的一段緋聞從不間斷，問他覺得薛凱琪如何？祖名謂：「佢份人好直、好有性格，但佢仲未到頂，要繼續努力。」至於發展機會，祖名答案仍然「行貨」：「𠵱家要努力事業，拍拖結婚都起碼係30歲之後嘅事。」
採訪：吳佩思
攝影：葉君海
場地：House
