大型銀行又有高層變動，今次係渣打集團（2888），佢哋嘅執行董事南凱英，噚日起辭任集團職務，新聞稿話佢會「開展其他事業機會」。華華估計，以南凱英呢位銀行界人才，一定係搵到好路數。
渣打宣佈，南凱英嘅接任人係白承睿，將會負責整個亞洲地區（南韓除外）嘅增長及管治工作。不過，呢位白先生嘅職位仲係渣打「銀行」董事，而非「集團」董事，地位始終差一皮。
南凱英98年加入渣打，99年5月7日出任董事，喺董事局嘅年資長達8年，佢擔任集團執行董事負責亞洲地區期間，渣打喺嗰區嘅業務大幅增長，集團同佢梗係好嚟好去啦，渣打喺上市公司公告裏面都特登讚佢：「（南凱英）從事了一段長久及卓越的事業後退任。」就連集團主席戴維思都話，佢一直係董事會高度重視嘅成員。