合和（054）太子爺胡文新一向鍾意打冰上曲棍球，下個星期六、日又會參加一年一度嘅業餘賽事，同賭王個仔何猷龍同一隊打波。由於九龍灣新開嘅MegaBox個冰場較西九龍大，賽事搬咗去MegaBox搞。
唔講唔知，原來胡少細細個喺荔園學花式溜冰，佢話踩冰踩得快，打冰曲做後衞一流，可以第一時間衝番去自己嗰邊回防；隊友何猷龍就做前鋒。
講番合和喺MegaBox附近個場，即係EMax，胡少話爭取緊做09年東亞運動會保齡賽場地，將會斥資擴建球道，由𠵱家廿幾條增至48條，更符合國際賽規定。
有記者行家問胡少係咪因為個場無乜人租或者租金低，至捨得擴建球道，胡少冇答。不過算啦，唔係個個場都要賣衫褲鞋襪，做最多球道嘅保齡球場都好吖，唔怕出現流量飽和，又有特色。當然，個場賺唔賺就另計。