現年29歲嘅姚嘉妮舊年11月至同林祖輝結婚，但前晚佢忽然撇甩老公，着住緊身tee襯短裙，去沙田夜會一位貌似梁漢文（梁炳）嘅男伴撐枱腳，姚嘉妮仲體貼到不得了，移船就磡去對方屋企附近嘅隱世食肆開餐，又做柴可夫管接管送，真係殷勤好招呼。
龜速接送
前晚8點，齊戴cap帽嘅姚嘉妮同「翻版梁炳」出現田心邨嘅河合居活魚日本料理開餐，點咗刺身、雞泡魚亁、烏冬同日本清酒等，大家邊食邊傾，一時講揸車，一時又講打機同股票，天南地北雞啄唔斷，女方講得興奮時仲不停指手畫腳。
兩個鐘後，姚嘉妮同老翻梁炳埋單，由男方畀錢，承惠320蚊。之後佢哋並肩攞車，途經坐滿食客嘅大牌檔時，姚嘉妮即彈前幾個身位，一邊搓肚，一邊低頭以帽遮面，到拎番佢老公名下、落地4個月、價值約30萬嘅Harrier座駕接載男方走時，兩個人至放膽繼續傾，唔知係咪因為講極唔完，姚嘉妮竟以40咪嘅無敵龜速，慢駛到沙田巿中心放低男伴，然後再揸車離開。
噚日馮仁昭打畀姚嘉妮，佢話老翻梁炳係自己嘅圈外朋友啫：「我哋之前同一班朋友聚會，但走淨我哋，未食飯咪一齊囉，我成日都會同唔同朋友食飯，都冇乜嘢啫，咁啱老公開工至嚟唔到。」
