花旗股市前晚雖然上升收市，但係信貸危機就越嚟越令人擔心，聯儲局同歐洲央行已經泵咗好多水入銀行體系，但係都好似擔沙塞海咁，填極都唔夠，前晚又各自泵咗幾千億港元入個市，數期又係好長，點解會咁？銀行有壞賬，加埋自己喺次按市場同CDOs嘅投資損失，條數點會咁易填得番。
滙控（005）行政總裁紀勤前日話次按嘅禍害要明年先浮現，唔知佢係講緊環球性嘅影響定係講對滙控嘅影響，不過，之前有好多分析員質疑滙控撥備不足，紀勤呢番話係咪放定風，到公佈業績時，唔使嚇大家一跳，到時大家就會知道。
前日港股收市之後，人行宣佈調高銀行存款準備金率，本來都冇乜大不了，加咗咁多次，都麻木咗嘞，之但係溫總話宏調係首要任務，官報又話股市有泡沫，睇嚟中央可能會出啲壓得吓場嘅措施，等班炒家唔好成日當中央冇到，俊樺諗緊有乜嘢措施咁有威力呢？好有可能係之前傳過嘅「調高加息幅度」，一加就係0.54巴仙，比正常嘅0.27巴仙多一倍，呢招應該會有用，但係唔知到時股民會唔會反應過敏，搞到國內股市跌過龍。
平保C輪1379：平保（2318）昨收81.40元，呢幾日喺80元爭持，昨日終於憑收市前嘅大買盤掃上80元樓上收市，個勢要去88元嗰頭，可以買啲平保C輪1379炒一轉，隻輪昨收2.54元，槓桿率3.2倍（有效3.1倍），對冲值0.94，正股升上88元，1379應該唔會低過3.10元，正股跌番落去78元樓下止蝕。