澳門威尼斯人酒店未完全落成，已經開業，因宣傳得巴閉，上星期吸引幾萬人去參觀，記者特登去採訪，採訪結果如何呢？唔好話《蘋果》標題誇張嘞，睇吓九月三日《大公報》A8版嘅標題：「入住輪候似難民 招牌船河明掠水 威尼斯人混亂 遊人谷氣」。內文嘅小題有：「貼錢買難受怨聲大」、「大型會展能力成疑。」寥寥數語，已經講明，直情係「威尼斯人」嘅公關大災難。若然準備不周，就唔好開幕住啦，但賭場先至係大生意，酒店只係副業，人哋要提早搵食，香港人過去試新酒店，未免搵自己笨。
左丁山住過一次曼谷新酒店，經驗甚差，以後新酒店開張未夠一年半載，一定唔去試。拉斯維加斯嗰間「威尼斯人」住過㗎，服務唔算一流，但不至於等幾個鐘頭都未有房。一間三千房間嘅酒店，要請幾多位清潔阿嬸先至夠？執房用最快而且馬馬虎虎嘅態度，熟手阿嬸用十五分鐘走唔甩，如果所有住客一齊在十二點check-out，十二點check-in，兩小時內上房嘅話，要同時請足七百五十人。《蘋果》話酒店每層有一百間房，每層只有五個清潔工，於是在大堂等上房嘅客人點都要等四五個小時，何來五星服務？
唔好以為「威尼斯人」啱啱開業先至係咁噃。公子Ｌ係富豪一族，經常到澳門入住超級豪華酒店，佢對朋友講最近一次喺下午三時到酒店check-in，櫃枱部明知佢係名人公子Ｌ，但冇房就冇房，公子Ｌ要等到晚上十一點先至入到房間，中間八小時要搵辦法消磨。
酒店係勞工密集行業，冇人就冇服務，唔夠人就唔可以提供高質素服務。曼谷文華東方酒店經常獲選為世界第一、亞洲第一酒店，主要係服務好，聽講每間房就有一點五個以上嘅員工睇住。如果「威尼斯人」真係要提供五星服務，酒店起碼要招請四千五百人，淨係中層經理都要請幾百個。問題係，去邊度搵人？澳門啲酒店雖然在香港大力挖角，仍然唔夠，已開始向上海、北京、天津等大城市酒店搶人。酒店員工不比紮鐵工人，唔怕冇工做，只怕每日要頂更半（即十二小時）啫。