入讀中大醫學院嘅14歲女神童何凱琳，雖然取消咗今日親身到瑪麗醫院探望全身癱瘓嘅阿斌，不過佢人唔到，但把聲會到。凱琳錄咗一段約一分鐘嘅鼓勵說話畀阿斌，據講係叫阿斌努力振作，唔好再諗要安樂死，呢段錄音會由搞呢次探訪活動嘅元朗朗屏邨惠州學校（凱琳小學母校）師生轉交阿斌。
凱琳話，佢已經有阿斌電郵地址，可以同佢聯絡，第日會再安排時間親身去探佢。凱琳原本會同十幾個師弟妹今日一齊去，但消息曝光後，凱琳怕大批傳媒會湧去而騷擾阿斌，所以取消計劃。惠州學校前日入中大，諗住同凱琳拍段鼓勵阿斌嘅短片，點知佢有事要同教授傾，冇時間拍片，所以最後改為錄段說話畀阿斌。