韓流巨星李英愛素有「氧氣美女」之稱，無奈歲月不饒人，今年36歲嘅佢日前出席頒授文化勳章儀式時，雙頰鬆弛冇彈性，眼圈又長滿細紋，老態盡現。韓國網友對此議論紛紛，更穩坐韓國搜尋網Daum討論區人氣話題前20名位置㖭！
發起呢個討論嘅網民話愛姐肥咗，再加埋當日嘅服飾同髮型，完全「感受」到佢嘅真實年齡。網友ONO立即話：「睇起嚟簡直係40幾歲。」有人更笑愛姐係咪最近冇打肉毒桿菌除皺，搞到水腫兼皺紋出番嚟，阿Deep都覺得佢哋講嘢勁刻薄！
「似米高積遜」
網友BlueWind仲衰，用米高積遜（MichaelJackson）嚟形容愛姐。其他網友就叫佢快啲搵個好歸宿，否則再老啲就唔會有人鍾意。
好彩都有網民支持愛姐，話佢喺03年拍《大長今》時個樣都差唔多，雖然𠵱家係肥咗，睇起嚟較老，但都因為養尊處優嘅緣故，到有新工作時，愛姐就會以最佳狀態示人。
WORRI又話：「李英愛表現出來嘅老，正正係代表天然美態。」另外好多網友留言，無論愛姐老抑或後生，肥抑或瘦，都始終咁靚呀！
網址： http://tvzonebbs3.media.daum.net/griffin/do/phoshop/read?bbsId=A000009&searchValue=&articleId=191702
版主：網盜王尊尼Deep
本欄逢周一至五刊出