原本國際賽不值重心下注，不過去到歐國盃出線關鍵時刻，部份強隊會醒番，加上唞咗成個禮拜，球員體力充足，不存在留力踢下周三之戰，故個人估計今輪賽事熱門佔盡上風。非直播重心捧回蘇嘅挪威；直播比賽，由基斯坦奴朗拿度領軍嘅葡萄牙勢大炒波蘭，挽面子。
首先講番周中撐畢傑嘅巴甲貼士，佢大字標題叫人買甘美奧贏，結果順利得手；仲帶挈小弟命中3串1過咗一陣榜首癮；巴甲馬不停蹄未來兩天又玩過，我奉勸大家一句咪信馬會落飛異動盤；近兩輪「讓球」盤瘋狂落飛嘅山度士同啱啱嘅聖保羅上盤都失手，喺度唔講貼士喇，大家信嗰位旺人啦。
主力回蘇 摩軍難抗
言歸正傳，10幾日前挪威主場喺直播對阿根廷時踢得虎虎有威，結果贏2:1，班波有部份球員回蘇，最明顯係長人中鋒卡維，剛又替維拉打敗車仔，有佢喺前線，搭艾法臣或巴坦，又有英超猛將懷斯同摩頓柏達臣後上；何況佢哋𠵱家喺C組7戰得13分排第4，落後榜首嘅希臘5分，但同2、3名嘅波斯尼亞及土耳其同分，為咗爭次名出線甚至以首名晉級，挪威又點會唔搏呢？所以一於捧挪威作客C組包尾嘅摩爾多瓦可以大勝而回，而入球就梗係開「大」啦！
捧葡軍「波」「大」有腦
直播必捧葡仔，上場喺阿美尼亞失分可以賴個氹仔場，不過後防唔掂係不爭事實，博贏外，入球「大」真係穩如鐵塔，睇吓儲咗幾日火嘅C朗做唔做到連珠炮發啦。
蘋果波神
沒有成功，沒有失敗，最重要你是否仍然享受箇中樂趣，否則不如不玩好了。
近5場往績：輸贏輸輸