新馬季明天開鑼，唔少朋友又試在馬場相見。上季投注額有輕微增長，二○○七/○八年度馬季適逢股市大幅反彈，七月份汽車銷量勁升五成六，睇嚟新馬季嘅投注額可以再度上升，唔使馬會掏腰包嚟補足八十億元稅款。
今季馬會有新猷，就係馬主以及馬主邀請入場嘅馬會會員可以帶同未滿十八歲嘅兒女入沙田場，跑馬地夜馬仍然不准未成年人士入內。不過對未成年人士嘅限制仍然幾多，包括：
（一）其父母已在馬會廂房（JockeyClubBox）或馬會會所六樓私人宴會廳（例如獅子山、飛鵝山等）已經訂座；
（二）非馬主子女而係會員子女，其父母係賽馬日馬主之來賓；
（三）嚴禁投注；
（四）須時刻由父母陪同方可進入馬會廂房或會所六樓、馬匹亮相圈、凱旋門等範圍；
（五）必須在訂座時登記姓名。
雖然限制多多，已係一大進步，以後馬主可與未成年子女、孫兒一齊拉頭馬，在凱旋門影番一張全家福。香港與英美、澳洲、日本等文明國家不同，十八歲以下人士不准進入馬場。六月時左丁山到日本參觀安田紀念大賽，見到大批日本父母帶小孩子入馬場，玩得唔知幾高興，點解香港係要唔准細路入馬場呢？左丁山難以理解。自小入馬場是否長大必然成為馬迷、賭徒？其中冇邏輯性，只係古老石山先至會話唔好、唔好。
賓架P知道自己隻馬聽日出場，急忙訂枱，點知會員廂房已經滿晒，問左丁山有乜辦法，左丁山叫佢屈就一下，向左丁山搭枱，佢又話唔制，要另諗辦法，總之一定會到場。咦，咁積極，唔通佢隻團體馬有計，一於吼實先。佢隻馬喺七月二號跑第二，聽日出四班千二米仍然配番鄭雨滇，成個搏殺格啫。今季季初形勢受澳洲馬染上流感所影響，好多澳洲新馬要延遲來港，換句話說，啲有分有實力嘅舊馬必然在○七年內盡力搏殺，到咗○八年第一季，就未必夠殺到嚟啲質新馬砌嘞。