聽人講，浸大神童沈詩鈞係沈大師——沈振盈親戚？噚日華華見到大師，即管問吓。
大師笑笑口話：「唔係，好多人誤會咗，我鄉下喺番禺，同神童唔同；雖則我都係跟族譜，用『振』字改名，同神童老竇嘅『振雄』相似，但真係如有雷同，實屬巧合，我哋無關係㗎！」
睇番啲傳媒報道，神童沈詩鈞曾祖父沈清江，祖籍福建省安溪市，又真係同大師唔同鄉下。
不過，大師同神童，都係一樣咁非比尋常！
俗語有云：「好馬不吃回頭草」；沈大師就話，條草有「價值」，又怕乜食！咁講，係因為佢前幾日，第三度重返英皇證券（717）返工。
咁吸引大師嘅「價值」一定唔少，除咗重金之外，相信仲有「面」。老闆楊玳詩Book咗細佬間Dragoni，幫大師搞WelcomeParty，大老闆楊受成專程嚟撐場，今鋪仲唔威到盡！
第三度重返英皇證券
大師94年第一次入英皇，係第一批經紀，做咗一年就辭工出去闖蕩。齊秦都唱「外面的世界很精采」啦。不過，「外面的世界很無奈」，所以大師出咗去冇耐就碰到焦頭爛額，96年頭返英皇。直到99年，大師有番咁上下知名度，俾匯訊高薪挖角，睇「價值」嘅大師咁就蟬過別枝。
大師話今年7月，同楊玳詩食過幾餐飯，喺郎有情妾有意之下，9月3日第三度返英皇！
楊玳詩好老實咁話，主要係睇中大師嘅知名度，除咗希望可以吸引多啲大師嘅本地「粉絲」做新客，國內同海外嘅客都想擸晒。佢仲話，大師返咗幾日工，日日都有「粉絲」上公司搵佢！
港股唔跌就升
成日上財經討論區嘅朋友，應該對於沈振盈個朵──「沈大師」好熟悉。近排個市咁波動，華華噚日見到大師，梗係搵機會問吓佢對後市點睇。大師話：「短期會喺23800至24500點徘徊，年底有力上到二萬五；不過呢，亦有機會下挫返去二萬二，主要係睇吓伯南克減唔減息！我覺得佢有好大壓力㗎……」
唔知點解，華華突然諗起細細個嗰陣，跟母親大人搵過一個睇相嘅赤腳大師，佢同母親大人講：「你個仔有機會做老闆，好大機會做到大老闆；不過，都有機會只係打份牛工。」Bingo，咁細嘅機會都中咗！華華的確打緊份牛工。
[email protected]
