寫blog有人愛用文字，有人則喜歡用snapshot，也有人採用圖文混合自由式表達感受，網民「大強」喜歡畫公仔表達感受。
自稱未夠三張的大強，已有逾10年網齡，活躍於歷史悠久、文章數量長年保持全港第一的TVGroup新聞組。在這個大家閒來無事坐低吹水的地方，大強常以簡單的畫風贏得網民會心微笑。
然而，大強接受Net神訪問時說，近年香港網絡自由越來越窄，上網吹水越來越冇癮，令人無奈。
Net神：你覺得𠵱家嘅香港網絡文化同以前有乜分別？
大強：我覺得香港嘅網絡自由越來越窄，近年好多針對網上言論嘅指控，搞到大家都唔敢大膽發言。好似早兩年有人話香港變疫埠俾人告，有人吹吓水話強姦又俾人捉，呢啲喺好多年前都唔會發生，大家知道係講笑。
Net神：但係有人話網絡言論都要負責任喎！
大強：其實好多人日常喺現實世界講嘢都係吹吓水，只不過喺網上有證有據有記錄會俾人搵得番咁解，所以𠵱家好多人上網都唔敢大膽講嘢。
Net神：所以你選擇畫公仔？
大強：其實細細個已經鍾意畫公仔，我又懶得打字，所以玩blog開始便以畫代字，畫畫吓啲朋友話覺得幾好笑，就一直畫落去。我覺得自己啲畫好似小學生塗鴉，但好多人都話幾好睇，仲有人提議我可以出書，又有人搵我出Tee同公仔，不過只怪我個人懶到出晒汁，所以暫時都冇呢啲打算。
「大強Blog廊」（ http://hk.myblog.yahoo.com/dhl-dhl）
「TVGroup新聞組」（ http://put.hk/reader/news.hkux.net/rec.tv.html）
大強最愛畫公仔表達感受
