「就算要打止痛針，我都要謝拉特出戰以色列。」「唔得！你咪亂嚟呀！」以上兩位領隊嘅對話內容，係我求大俠前晚親耳聽到嘅。英格蘭嚟緊周六就會喺歐國外E組迎戰以色列，呢場關乎到英軍去唔去到決賽周，所以領隊麥卡倫好緊張，話要學利物浦主帥賓尼廸斯咁，要幫謝拉特打止痛針喎。
謝拉特喺周中又試缺席操練，好多球迷都好擔心佢可唔可以出場鬥以色列。你哋知啦，英格蘭已經冇咗林柏特同朗尼等主力，謝拉特就更加顯得重要。所以如果呢位紅軍隊長周六前仲有傷，麥卡倫已經諗定計仔，話要打止痛針都要謝拉特出場。
賓帥反對打止痛針
記得早前8月中利物浦對車路士前夕，謝拉特都係有傷在身，搞到領隊賓尼廸斯要幫佢打止痛針先可以出戰車仔。今次麥卡倫有樣學樣，不過臨打針之前賓帥出嚟阻止話：「你唔可以咁樣對我嘅球員！」麥卡倫理直氣壯咁回應：「先前你都係咁對謝拉特啦，家陣國家隊有難，做得國腳點可以縮沙？」
我求大俠聽完都唔知幫邊個好，正所謂話晒利物浦先係謝拉特嘅米飯班主，出得糧畀你，要你點就點。咁先叫做天地有正氣，你估謝拉特真係謝老四？不過話分兩頭，假如我求大俠咁勁可以入選到英格蘭大軍，我就乜都唔理，話晒代表國家隊比賽係無上光榮嘅事，打針咪打囉，打手臂咋嘛，又唔係打屁股？呢單打針事件相信有排拗，周六球迷就睇吓謝拉特得罪邊位領隊？