現年35歲嘅台灣天后張惠妹，噚日終於承認情歸細佢11年嘅台灣啤酒隊籃球隊員何守正。阿妹上星期去澳門為威尼斯人賭場演出後，第二日晚就俾人影到佢揸車由台北寓所去何守正屋企樓下等情人，後來兩個仲喺車廂中談情個半鐘，其間阿妹輕依何守正肩膊，兩個又頭貼頭似熱吻。
拍廣告認識
本來噚日阿妹要幫台灣電視台拍外景，點知咁蹺取消咗，佢就透過經理人陳鎮川證實係同何守正「試着剛交往」，仲話關係比好朋友多一點點，但未到男女朋友階段，講咁多咪即係有嘢？
其實，阿妹舊年6月拍台灣啤酒廣告時，同做廣告男主角嘅何守正認識，後來佢經常出現台啤隊員嘅聚餐。直到今年6月，阿妹俾人踢爆追求何守正成功，二人已經撻着，當時有女友嘅何守正強烈否認，但又好快宣佈同女友分手，有指其實嗰陣時，正妹戀已經萌芽，𠵱家戀情由地下浮上面，因為男友係阿妹鍾意開嘅高大帥氣有才華類型，加上甜言蜜語聽不停，搞到阿妹近排心情不知幾靚！
