一向予人Playboy形象的楊其龍，前晚自爆為父親搞樓盤及上海生意，開始正經從商，但又直言會繼續玩。他揚言不介意與內地姑娘拍拖，更即場示範兩句水皮媾女用語「喎艾梨」（我愛你）、「喎是歡梨」（我喜歡你），十分搞笑。
名模樂基兒、LisaS.等前晚在中環為華裔設計師VivienneTam行騷，演繹摩登俏麗的中國風新裝，吸引了霍震霆與兒子霍啓山、鍾嘉欣、寇鴻萍與女兒唐貝詩、名模呂燕及楊崢等捧場。
家人頻頻催婚
前晚楊其龍罕有穿上恤衫以斯文打扮現身，他透露現忙於為父親楊受成搞淺水灣及上海房地產，問他是否修心養性，不做playboy正式成為商人？他說：「差唔多係時候轉啦，都要正經幫屋企手，不過我未玩夠，一定會繼續玩。」問楊其龍修心之後是否會成家，他說：「日日屋企都催結婚，由朝到晚都叫我快啲。」他又謂早前出席生日派對的女伴只是好友，並非女友。
楊其龍指到上海工作若遇到合心意的女性，也不介意與內地姑娘拍拖，更即時拋書包講普通話說：「我識幾句，好似『喎艾梨』（我愛你），同『喎是歡梨』（我喜歡你）。」不過記者就聽得一頭霧水。
鍾嘉欣玩懷舊
此外，鍾嘉欣是夜獲贊助新裝，以懷舊造型亮相，她大讚設計說：「高貴有女人味，密實得嚟又性感。」嘉欣謂不介意性感示人，現時更開始轉型嘗試狂野look，問她可會效法陳法拉，她即說：「唔會，大家唔同style，我間中會騷吓，都有嘢睇呀，我對自己身材有信心。」
採訪：羅慧敏 攝影：陳順禎
