噚日華華收到美聯（1200）e過嚟嘅一幅相，咦，無啦啦，點解瑞銀陸東會去美聯講talk嘅？
話說美聯每個月都有「月會」，通常主管級先有機會出席，除咗財金人士，仲會搵政界中人做演講嘉賓，好似之前就請咗范徐麗泰；各大地產發展商，尤其係嗰排有樓開售嘅，就更加唔少得啦！至於搵陸東已經唔係第一次，舊年9月就請過，今次只不過冧莊。
唱好股市升穿23000
陸東係「港股大好友」，舊年唱好股市被捧為股神，今次會唔會又唱好港股呢？中晒！美聯個friend話，陸東喺會上極度唱好港股，話會升穿二萬三。咁樓市呢？去得地產代理公司做嘉賓，台下300幾個靠樓搵食嘅代理，唔唱好樓市，真係想即場拳拳到肉咩！
陸東話香港按揭機制健康，仲有就放行嘅資金自由行……總之一句到尾，樓市一定好。講完掌聲雷動，預咗啦！