講開邵六叔，忽然令華華諗起由細到大睇TVB台慶，都會等住欣賞「壓軸」環節，就係高貴嘅利孝和夫人陸雁群，着住件設計得好特別嘅旗袍，加埋好搶嘅綠色eyeshadow，好用力咁將把刀拮落個道具蛋糕度。
當諗到利夫人，又會令華華聯想到，佢個姪、莎莎國際（178）首席財務總監及執行董事陸楷。諗起佢，係因為陸楷曾經同華華講過細個時嘅志願，佢話好細個已經係教徒，又讀天主教學校，每次見到啲神父，都覺得好有親切感……冇錯，佢嘅志願就係做神父！
最終得個噏字
當佢將呢個宏願講畀屋企人聽，家人嘅反應係──聽完就算，皆因知道呢個𡃁仔腦囟都未生埋，又點會知自己想點。咁佢屋企人又確實幾了解佢，原來佢真係得個噏字！
發完夢又講吓旅行，陸楷話暑假同屋企人去咗北歐兩個幾禮拜，小住幾日；跟手就喺哥本哈根上船，一直坐到去瑞典先落船，前後一個星期，不知幾爽！