前嗰排，成班環保人士操去中環長江中心踩場，要求長實（001）減建屏風樓。當時超人李回應話，塊地本來話可以起50萬呎，結果變成25萬呎，所有地產行家就會當25萬呎去計，影響嘅係庫房收入、香港人嘅收入。
超人即係超人，講出嚟嘅「道理」唔單止令華華折服，估唔到連「寃家」、合和（054）主席胡應湘（圖）都企埋同一陣線。
噚日哥頓胡出席《金融時報》嘅地產論壇，會後被記者問到屏風樓唔環保嘅問題。佢話：「已經規劃咗起幾高，又有人吹雞話要起低啲，降低幢樓嘅資產價值。」佢仲激到拎張十蚊紙出嚟做示範，「明明印咗係張十蚊紙，你夾硬要話佢係五蚊紙！」華華第一反應係，舉例點解唔拎張金牛出嚟呢呵！