師奶炒股，大行其道，香港師奶大炒國企股，日本師奶（外號為渡邊太太或和服炒家）大炒外匯，皆令外國人矚目。日本人因為日圓利率太低，收取利息不足以搭地鐵，而且日本男人出糧後就交晒畀太太，故此日本師奶為了謀取家庭幸福，不惜買入大量高息貨幣如澳元、紐元，實行利差交易，今年八月中日圓大升，澳紐元可以一日跌七、八百點，有人話係對冲基金拆倉，取回美元以應付基金贖回，其實中間亦有大量渡邊師奶平倉止賺盤在內。當今澳紐元咁浮動，有渡邊師奶因素在內。
群眾可能比啲專家愚笨，甚至係跟風羊群，但群眾智慧加起嚟，就造成一個市場動力，反過頭嚟推動專家跟風（所謂貼近市場也），互為影響，所以我哋都唔知專家叻還是群眾笨。師奶炒家係群眾縮影，佢哋睇好國企股，非Ｈ股不買，足足反映市場心態。
話說外國專家話（實在啲就係大摩嘅RuchirSharma摩根史丹利投資管理之新興市場主管），美國次按風暴，影響歐美，但亞洲國家經濟基調良好，中國繼續快速增長，對美國嘅倚賴程度，日漸減少；十年前，亞洲發生金融風暴，靠一個國家──美國力撐；十年後，美國發生次按風暴，世界靠一個國家力撐，呢個國家就係中國！
既然如此，大摩投資一定係倚重中國股票啦，同香港師奶有乜分別？一於大家鬥癲，癲到佢爆為止，正如花旗主席ChuckPrince曾在次按風暴前，對《金融時報》講過：「音樂仍然飄揚，我們不能不繼續跳舞。」呢個情況令左丁山想起一九八七年，當時未有電子交易，買賣幾毫子嘅股票，每手一千，交收時數股票數到手指痛。股災前幾個星期，左丁山日日為公司沽出幾百萬股（某毫子股，公司名稱不便透露），股價愈賣愈升，由五毫升到七毫幾，愈係升，左丁山愈係沽得急，直至到滙豐銀行打電話嚟：「喂，左丁山，我哋積存太多你隻股未交收，唔該你暫時唔好賣住，得唔得呢？」應承咗之後幾日，股災降臨，啲股票以後都賣唔出去。