做宣傳推廣，最緊要人多勢眾，好似渣打出錢贊助嘅「馬拉松101教育計劃」咁，搵咗101個小學生，齊齊起跑四圍走，成班細路𠵱嘩鬼叫，嘈到拆天，氣勢厲害到連香港個人銀行業務主管洪丕正都為之側目，真係想唔知件事都好難！
自97年開始至家陣，渣打馬拉松都搞咗11年，已經成為本港一年一度盛事，家吓喺唔少人心目中，「渣打」幾乎等於「馬拉松」，華華真係要讚吓當年諗出透過贊助馬拉松做推廣嘅嗰位仁兄。之不過，淨係受16歲以上嘅大朋友玩，好似嘥啲，反正都出咗咁多錢，梗係用盡個品牌啦，所以佢哋舊年開始，將推廣計劃擴展到小朋友身上──不過唔係跑步，而係教育計劃！
梁鑑章攝