今日，大家試試代入角色，想像一吓自己係個19世紀嘅炒家。當年，其中一樣最多人買賣嘅嘢，就係我國茶葉。
好，問大家一條問題，如果1斤茶葉喺福建省賣2盎斯白銀，而1斤同樣、同級嘅茶葉喺倫敦賣10盎斯白銀，你想買茶葉，你會喺邊度買？
大家作為《金手指》嘅fan屎，聰明絕頂，一定會話：「有咁嘅情況，最好當然係喺福建省買茶葉，跟住就喺倫敦賣番出去！」係，冇錯。如果可以，福建茶葉同倫敦茶葉嘅價格分別同折讓，就會因有醒目仔從福建運茶葉去倫敦，套戥兩地茶葉價嘅分別，而消失。
醒目仔必備三點
套戥係個醒目仔先識做嘅玩意。因為，第一要知道兩地有價格分別。第二，又要確保福建賣緊嘅茶葉，同倫敦人想買嘅茶葉係一模一樣。第三，就係要知點樣將茶葉由福建運去倫敦互相流通。套戥成功，三步缺一不可。
呢排，大家都知道特區股市嘅上升動力，來自「資金自由行」，A、H股有折讓，所以會有好多人嚟套戥。用以上嘅茶葉故事，等如以前只可以喺倫敦買茶葉嘅人，可以去福建省買。有人就憧憬因為有倫敦嚟嘅購買力，福建茶葉價格將會大升，所以就炒先一步。不過頭先已講過，要套戥成功，兩地嘅茶葉一定要互相流通。冇得互相流通，只係「理論上」可以套戥。因為只係「理論上」應該冇差價。
當今世上醒目仔，最高IQ嘅醒目仔就肯定係搞對冲基金嘅諾貝爾得獎者。當年有一間有諾貝爾得獎者做董事，最後倒閉叫做LTCM嘅對冲基金，就係醒目得滯，進行冇互相流通嘅「理論上」套戥。
執笠皆因唔流通
當年，如果你想買RoyalDutchShell嘅股票，唔可以直接買。你只可以買佢兩家母公司嘅股票，RoyalDutch或者Shell。一個喺荷蘭上市，一個喺倫敦上市。兩家母公司嘅資產一模一樣，就係擁有RoyalDutchShell50%股權。荷蘭、倫敦資金絕對可以流通。所以理論上，RoyalDutch同Shell嘅市值應該一模一樣。
其中一個令LTCM倒閉嘅交易，就係當時RoyalDutch同Shell嘅市值開始有分別。LTCM就借咗好多錢買佢哋差價收縮，點知差價進一步擴闊，最後執笠。所以所有買A、H股折讓收縮嘅朋友，大家一定要記得LTCM班醒目仔嘅收場。
金手指網誌： http://phatdat.blogspot.com