中環在線:港龍問卷查廁所臭唔臭 - 李華華

中環在線:港龍問卷查廁所臭唔臭 - 李華華

華華上個禮拜六坐港龍航空飛上海一轉,今次行程順利(touchwood),冇delay,臨落機前10分鐘,靚女空姐拎份問卷畀華華填。哇!份問卷A4嘥士、7大版紙、十幾條問題,每條問題再有幾條分題,由機場櫃位登記服務問起,上至飛機廁所質素,可以揀臭唔臭、亁唔亁淨;下至地勤同空姐儀容、禮貌,細節到不得了,封面仲有行政總裁鄧國杰一封短信。
成份測驗卷好費神
老實講,華華真係好耐冇見過一份咁認真嘅問卷,據聞呢個調查喺今個月一號開始,華華咁都中正獎,真係好想喺卷尾加一個意見:下次可唔可以做份簡短啲嘅問卷呢?成份測驗卷咁,好費神㗎嘛!
重視乘客意見,改善服務質素係應該嘅,事關港龍將於11月加盟「寰宇一家」,熟客搭聯盟任何成員航空公司嘅航班,可賺里數同換獎賞,不過咁都唔使送份「測驗卷」畀客𠺝,吓嘩!