噚日港股一度再創新高，雖然收市微跌18點，但股市長升長有。不過Nocontrol居安思危，提出：「唔知大家有冇呢種感覺，全球大鱷聚首香江。」何解會有呢種感覺？佢解釋：「𠵱家亞洲股市跌嘅居多，好似日本、台灣同南韓咁，但恒指就屢創佳績，全球熱錢入晒嚟香港炒股，目的何在？梗係吼實內地嘅資金自由行，都唔知係喜定悲？」
冇新錢點掠水
Willauyo就話：「我哋香港有貝貝，咪吸引好多大鱷嚟囉。」大隻金亦話：「個市風平浪靜，冇資金入嚟，塘水滾塘魚，邊搵到錢㗎，梗係要風起雲湧，上上落落，有危就有機嘛！」
Frankie3759仲拉埋四叔落水，「香港畢菲特四叔咁揚，成日話賺咗幾多幾多，梗係吸引唔少基金入嚟推波助瀾；不過要小心，升得快時，跌得可能仲快。」
悲定喜冇人知
Kimy888較為穩陣：「家陣咁嘅時勢，都係揸多啲現金，靜觀其變為上策。」不過29人就認為：「其實，係悲定喜，根本冇人知。」北方狼回應：「大鱷只會不懷好意，唔通幫散戶賺錢咩，最後嘅結果，只會係悲。」
http://www18.discuss.com.hk/viewthread.php?tid=5210707&extra=page%3D4&page=1
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]