美國政府公佈，舊年年尾有3650萬窮人，佔總人口12.3%，低過05年嘅12.6%，改善幅度有0.3個百分點，係布殊7年前上任以嚟，貧窮率首次「大」跌；05年嗰時，貧窮率只係跌咗0.1個百分點。仲有，失業率偏低，家庭收入中位數舊年升到4.82萬美金（約37.6萬港銀）─終於有個好消息，冲喜吓飽受次按危機困擾嘅美國經濟。
屋企大過歐洲中產
attiladhun2喺《FreeRepublic討論區》話：「調查顯示，呢班『窮人』，其實大部份生活水準好高，當中65%屋企裝咗有線電視、97%有彩色電視機、87%有電話、46%甚至有樓、76%有車、超過30%有多過一部車，多數窮人都有冷氣機。美國『窮人』嘅平均居住面積，仲大過歐洲中產階級。」
weegee講：「美國有好多非法入境嘅墨西哥人，睇起嚟好窮，但就經常滙錢返墨西哥，所以，呢班非法入境者其實唔算窮，唔應該攞經濟援助。」
美國設定嘅「貧窮線」，係個人每年收入約1萬美金（約7.8萬港銀，即每個月6500蚊），或者四口之家每年收入約2.04萬美金。