噚日係邵氏（080）周年股東大會，華華猶記得舊年約莫呢個時候，主席邵六叔入醫院引發賣盤風波，當時邵氏即刻出通告話有人想買，點知轉頭六叔出院兼去埋半島表演HighTea真人騷，之後再精精靈靈主持股東會。喺舊年個股東會上面，六叔老死兼邵氏獨立非執董周亦卿認自己係中間人，介紹買家畀六叔，卲氏個掌櫃JeremiahRajakulendran又話不時有人向佢哋「示愛」。
春花秋月又一年，今年加埋172歲嘅六叔、六嬸仲係正副主席，雖然桃花依舊，但人面並無全非！咁噚日大家就照舊向六嬸拋出一條必問嘅問題，即係六叔幾時退休、搵到接班人未呀？好彩今年有啲新意，有條新嘅問題──點解將無綫收費電視兩成股權賣畀賭王四姨太？
就六叔是否退休呢個問題，六嬸個舊答案係：「考慮緊」；接班人呢？「我哋𠵱家個班底好好」；至於收費電視嗰條，sorry，六嬸無答。同樣，有人問，傳聞六叔會趁100歲壽辰之時，將一生心血易手，六嬸都淨係笑笑口……唔答。
接班人？ 六嬸囉！
不過，世事往往出人意表，正當大家喺樓下送完「六氏」伉儷上車，諗住已硬食白果之際，估唔到身兼公司秘書嘅Jeremiah喺樓上爆料。佢話無人inform佢六叔要退休，但被人問到如果六叔真係退休，邊個會係接班人？佢話mostlikely會係Ms.Fong。
呢個答案，華華夠膽講，從來冇人講過（雖然個個都係咁諗！），咁究竟係Jeremiah唔覺意誤洩最高機密，抑或係特登放風，又或者仲另有內情呢？相信只有董事局幾位老人家先至知！
[email protected]