中通信（552）專門做各類電訊工程同服務，由中電信集團分拆出嚟，都係諗住服侍阿媽中電信之餘，亦可以喺出面搵多啲生意。
噚日中通信業績會，副董事長李平俾人問到，如果內地電訊業出現重組，由四間變成三間或者兩間，咁會唔會影響佢哋嘅生意？
放過洋嘅李總好淡定咁話，佢哋既係股東又係公司客戶，唔方便評論，但就話中電信（728）、中移動（941），同聯通（762）嘅董事長，都係電訊行業最優秀嘅人才。
嗱，唔好話華華心水清，四大電訊商，李總獨係數漏網通（906），咁蹺網通又唔係中通信股東喎。難怪有記者問佢，係咪覺得網通唔夠優秀呢呵？
李總都係優秀人才，點會唔知自己講錯咗，所以即刻話網通董事長張春江都好優秀，仲叫記者記住要幫佢補番。
梗係啦，張總當年未下海從商前，官至信產部副部長，聽講仲係40幾歲就升到呢個位，左睇右睇都係優秀分子啦，吓嘩！