現時線上遊戲主要都係以MMORPG（線上角色扮演）為主，亦係最吸引玩家捱夜練功、最能投入嘅類型。不過MMORPG好多時會遇到組隊問題，例如近戰類想找個補師，遠程又想找擋怪坦克，後期更往往要組5、6人以上才可開工。呢隻主打一人操控多名角色嘅《GEOnline》，玩家就少咗呢個煩惱，剛剛開始公開測試，MMORPG迷必定要一試！
記者：許福合
揀PVE唔怕被打
筆者喺公開測試時先申請到賬號就可以玩，安裝完程式後，仲要進行更新，不過過程都算快捷。而登入時同一般網上遊戲一樣，可以揀伺服器，玩家可以見到現時其中兩個伺服器有注釋係PVE，代表呢個係和平世界，唔會無情情被人打，其他伺服器每當睇唔過眼，就可以動刀動槍，非常刺激。揀定伺服器後就會進入家族大廳，選定家族名字後，就可以開始創立角色，一開始最多可以設定四名角色，但登入時只能選擇一個，原來系統要玩家先了解基本遊戲玩法，通過新手任務後，才可以組軍出發！
MCC自由組隊
遊戲特別之處係呢度，玩家喺家族大廳，可隨意挑選三名角色組隊，利用《GEOnline》特有MCC（MultiCharacterControl）系統，玩家就能同時操控三名角色戰鬥。由於要同單人MMORPG一樣操作三名角色有啲難度，所以MCC會配合AI系統，自動偵察範圍及攻擊，按照特定環境，可向每名角色下達唔同指令，玩家亦可以手動操作，享受組隊樂趣！亦因為有MCC系統，算係半自動化練功，所以有時人有三急，可將隊伍交由AI控制，亦算安全。不過AI不會自動拾取怪物掉出的物品，有人經過拾走就蝕底喇！
戰鬥姿勢擺Pose
唔好以為有MCC練功就無難度，因為MCC操作只能使用基本技能，打低幾級怪物當然輕鬆，但要挑戰Boss或暴走，玩家如何切換角色，使用適當技能，就係技術所在。另外職業配搭亦大有關係，再加上隨住等級及完成任務後，玩家可將部份遊戲內NPC角色收錄到家族內，呢啲NPC角色實力強橫，打王時相當好用！另一個影響戰況因素就係角色戰鬥姿勢，簡單來講係角色眾多技能會分為唔同姿勢，玩家戰鬥時可隨時切換，留意部份姿勢要指定武器或裝備，例如唯一能補血嘅斥侯，要補血就唔能裝武器。
角色配搭
雖然NPC加入家族時實力一般都相當唔錯，不過一般評語都指原創角色姿勢及技能比較多，最終會比較強，所以一般玩家都係以原創角色練功多。《GEOnline》主要分為5個職業，點玩法就由你配搭！
遊俠：坦克
遊俠屬於近戰型角色，由於可裝備盾及防禦技能，加上血多，一般玩家都係當作坦克使用，當要挑戰Boss級怪物，基本上係必備人物。
斥侯：急救兵
因為係遊戲內唯一能補血職業，自然受到重視，同時亦有多種實用Buffer，與遊俠一樣，家族內必有一隻！
魔法師：全體攻擊
魔法師無論喺唔同遊戲內，都係主要作出傷害輸出，除了高傷害火、冰、雷三系魔法外，還可以作群體攻擊，當被圍打或暴走時，就要靠魔法師清除。
狙擊手：大炮
能夠使用各式各樣槍炮，屬於遊戲內物理傷害最高職業，有狙擊手在隊伍內，清怪效率可以提高不少。
咒師：後期發威
咒師與魔法師一樣，都係遠程魔法為職業，不過單體威力不及魔法師，但具備攻擊、輔助及詛咒等魔法，初期不算好用，但後期會係相當強的職業。
Profile
主機：PC
類型：MMORPG
開發：Hanbitsoft
推出日期：公測進行中
官網： http://ge.wayi.com.tw/welcome.html
