謝霆鋒前日趁乖仔Lucas滿月之喜，帶老婆張栢芝去行街掃貨。日前佢喺北京拍嘢期間接受有線娛樂新聞台專訪，展示佢手提電話裏面寶貝仔Lucas嘅近照，相中嘅Lucas眼仔睩睩，相當精靈可愛，同霆鋒成個餅印咁。霆鋒話個仔有個小梨渦，可能係遺傳自佢爺爺謝賢。
講到初為人父嘅感受，霆鋒話最難忘係第一次幫個仔冲凉，用自己26年前出世嗰陣用過嘅浴盆，佢話：「我真係好感激我細個時嘅保母，竟然可以保留呢個浴盆，等Lucas可以同爸爸共用呢個第一次。」不過，佢一聽到個仔喊，就會叫佢唔准喊，霆鋒話：「因為我要佢beaman，所以佢出世唔夠一個月，我已經做一個衰人。」
勸栢芝咪減肥
對於栢芝生完之後好緊張自己嘅身材，霆鋒就叫大家幫忙勸吓栢芝，喺佢眼中栢芝永遠都係最美麗嘅老婆同媽咪，霆鋒話：「佢之前太瘦，所以生完BB只係肥咗啲，而唔係肥。」
