接連有嬰兒因飲奶而出意外的新聞，更有女嬰因此而猝死，頓時令好多新手媽媽大為緊張惶恐。而奶樽同奶嘴，就跟餵奶有密不可分的關係，不過眾多奶樽奶嘴，功能和款式花多眼亂，𠵱家啲奶嘴，就模仿足媽媽個乳房同乳頭，仲加埋唞氣防脹氣裝置。
記者：劉明慧 攝影：周旭文
Model：朱古力
初為人母，對餵奶自有不少疑惑，而且BB飲奶成日飲吓停吓，餵飽又要「掃風」，令好多新手媽媽不知所措。原來揀一個好的奶樽及奶嘴，對BB飲奶有絕大幫助，尤其係初生嬰兒用的奶樽，奶嘴孔不可太大，否則嬰兒吞得太急，除增加嘔奶機會，更可能令BB無法呼吸，所以揀選要慎重小心，就算買多幾款都唔緊要。
一條氣飲到尾
9oz$45/c
TOMMEETIPPEEhealth+check奶樽內的排氣系統，可以防止奶樽入面形成真空及氣泡，唔怕BB飲飲吓吮唔到，要中途放鬆奶嘴。中間有支感溫顯示棒，可以提醒媽媽奶有無過熱。
又暖又軟的乳房
9oz$46/c
TOMMEETIPPEE最似媽媽乳房，BB可感受乳房曲線，當奶嘴充滿奶水時，會又暖又軟，好似乳房一樣。奶嘴有防脹氣和排氣，啱飲慣人奶BB。
旅行最好用即棄奶袋
奶樽8oz$44.9
奶袋8oz（50個）$58.9/d
PLAYTEX就最合帶BB出街或者旅行用，只要將奶倒入去個奶袋，放番入個樽就可以餵奶，唔使下下消毒，又唔使帶到成副武裝出街。雖然方便，不過就怕小朋友會伸手搞個奶袋，唔專心飲奶。
樽底排氣
4oz$36、9oz$39/b
AVENT個奶嘴蓋邊有專利防真空邊緣，底部有排氣功能，食奶時可以將空氣推番入去個樽，令BB吸嘅係奶，唔係空氣。奶嘴有分月齡，4oz係1孔，9oz係2孔，配合BB飲奶速度。
矽膠支撐口腔
冇氣入口10oz$50、5oz$44/c
NUK係德國牌子，闊樽頸設計方便倒奶粉同清洗。
矽膠奶嘴特別加寬，可支撐口腔，避免BB飲奶時吸入過多空氣，而且外形仲設計到同媽媽乳房相似。
其他產品：奶樽
大多數奶樽都係塑膠做，來源地多係美國、歐洲或台灣等，所以揀奶樽，媽媽首先要注意係咪符合國際認可的安全規格，然後先揀款。
感溫奶樽 樽身顯示$56/d
Nuby底部有一列排氣孔，可令空氣直接由底部排去，有防脹氣功能；而樽身有個感溫貼，溫度適中時，會顯示OK字樣，不過就用手輕力捽佢都會有影響。
無菌母乳儲存袋（3個）$28/c
六甲村母乳儲存袋係台灣出品，除咗可以用嚟儲存人奶，仲可以當旅行奶樽。每個都獨立包裝，全部經過消毒，夠衞生，扭個奶嘴上去就用得，好方便。不過奶嘴蓋個高度得20mm，要同窄奶嘴先用得。
可以坐響度飲250ml$29
手柄版300ml$34/c
台灣牌子Q-BBYDOG，通過美國F.D.A食品藥物檢驗，有手柄那款，可訓練BB自己拎奶樽。入面有吸管，適合鍾意坐響度食奶的BB。
排氣管顯示奶溫
9oz$83/c
BfreePES用咗PES安全塑膠，唔係會釋放有害環境荷爾蒙雙酚膠，耐熱程度更高。佢有防脹氣排氣系統，可以減低食奶吸入的空氣，排氣管低有奶溫顯示，熱就變紅，唔使下下用手測試。
避免奶水流入耳朵
8oz（3個裝）$199/a
美國牌子Dr.Brown's有特別內置通氣管，可減少奶入面氣泡，唔怕BB因吸入過多的空氣而導致肚疼、嘔奶、打嗝。
而且奶的流速係控制到同人奶差不多，咁就可以避免奶水流入耳朵而引起中耳炎。（每套包括：奶樽3個，附0-3個月奶嘴，專用奶管刷1支。）
扮吮緊人奶 8oz$59（c）
CHUCHU係日本老牌子，玻璃做唔怕刮花，更加唔使驚PC膠致癌物質；SUPERCROSSCUT矽膠奶嘴有兩層，出奶口比較深，設計到好似吮緊人奶咁，方便啱吮慣人奶的BB。
奶嘴
奶嘴有分圓頭同扁頭。扁頭就較啱餵人奶媽媽使用，有些會據奶的流量速度劃分，初生BB就要用慢速奶嘴。
防漏兼按摩牙肉
$33/d
NUBY上面有好多凸紋，BB食奶嗰陣就可以按摩佢啲牙肉，有助口部郁動，不過就可能唔係個個BB鍾意。
去舌苔奶嘴
（3個）$24.5/d
艾比熊響個奶嘴面有環紋設計，響BB吮奶嗰陣，可以按摩舌頭，仲有去舌苔功能，不過洗嗰陣都幾核突，而且啲環紋好易藏污糟嘢。
模仿吮吸中乳頭
（2個）$25/c
NUK矽膠奶嘴係扁身，仿吮吸中的乳頭，近奶蓋位置有個排氣口，可以防脹氣。而響個奶嘴面上有啲環紋，等BB吮奶時，可以按摩舌頭同去舌苔。
快慢B都啱（1款2個）$26/b
AVENT奶嘴分4個階段，0歲至1歲，分1至4孔，另外仲有個可調奶速奶嘴，有3個速度，適合3個月或以上嬰兒使用，例如將奶嘴邊上的一劃對住嬰兒鼻孔位置吸啜，奶水流量就最少。
（a）父母精選有限公司（28383443）
（b）喜寧投資有限公司（24224476）
（c）BibiDadaBabyShop（24421100）
（d）荷花親子中心（26283818）