張學友一連18場「學友光年世界巡迴演唱會07」香港站演出，繼前晚他突然宣佈因喉嚨不適取消演出後，原定昨晚的尾場也決定取消。學友昨午特地在紅館舉行記者會親自交代病情，向觀眾道歉，並宣佈取消的個唱將於明年1月在西九龍新場地補演。其後他又到紅館外與守候的fans握手，以安撫大家失望的心情。
張學友昨日由個唱主辦人陳淑芬陪同下到達紅館，近百在場守候的歌迷甫見他即大叫：「學友加油！」學友即除下帽及口罩揮手及豎拇指回應，之後他首先進行還神儀式，再向歌迷拍着心口舉起OK手勢，並以唇語說：「冇事！」
感冒未癒
「輕微發燒咳得犀利」
學友的記者會吸引半百傳媒採訪，他的聲線不算特別沙啞，但說話時偶然會走音，間中咳嗽，精神尚算不俗，他說：「我要同買咗飛嘅朋友道歉，真係冇辦法，好抱歉，好多美國、加拿大同台灣地方嘅人特登嚟睇，對佢哋更加唔好意思。我覺得自己係個好幸運嘅人，唱歌23年，呢個時候開個唱仲可以咁盛況，係上天眷顧，另一樣嘢係我必須堅守嘅，就係台上嘅表演。大家買飛嚟睇，我企喺台上面如果只係跳舞，三個鐘係冇所謂，但呢個係演唱會，我冇辦法以演出嘅水準去演出，係唔可以接受嘅，咁對無論買幾多錢飛嘅朋友都唔公平，我當然希望18場做晒，平平安安啦，但𠵱家做到16場都好開心。」
學友講述病況時，透露演出至第12場已患上感冒，當時吃了藥，他說：「我怕唱唔到尾場，係一個壓力，諗住做到幾場得幾場。其實我主要係感冒，輕微發燒，咳得好犀利，聲帶有少少疲勞，唔係完全出唔到聲，亦唔係虛弱到跳唔到舞，但我係有三分一嘅歌冇辦法唱到，好似噚日7點50分我仲做最後綵排，但我覺得基本唱歌上嘅技巧都冇法做到，今朝都有繼續試，平時輕而易舉嘅嘢都做唔到，唔會有太大奇迹發生，所以我今日下午打畀陳太話決定取消，希望將來可以完全康復，帶一個完整嘅演唱會畀大家。」
談到有歌迷支持，學友說：「佢哋知道我個心好難過，今次咁樣唔係我願意見到嘅結果，唯一係可以道歉。」
學友又謂他為求病癒已想盡辦法，保持充足睡眠、做運動、多喝水及多吃東西，他說：「我要做嘅嘢都做晒，但冇辦法預測幾時身體支持唔到。」提到前晚有觀眾投訴太遲通知取消安排，學友說：「可以嘅話我都希望做到，已經試唱咗三次都唔得，我相信觀眾會想聽個滿意嘅騷。」問到是否因開太多場才導致身體支持不住？學友說：「之前喺香港都做過咁長，喺我角度係能唱同不能唱嘅分別，感冒可以兩、三日冇事，但我長期表演先冇法，我今晚會去打針，平時打針會冇聲，所以之前只食中藥。」本周五學友要到長春開騷，他謂屆時會照原定計劃舉行，他現時會調理好身體，也會與女兒保持距離，免得傳染。
陳淑芬昨日發出特別通告講述退票及換票細則，已取消的兩場個唱將於明年1月26及27日在西九龍PopTVArena戶外場地補演，持票觀眾可於明天開始至12日，於紅館外的換票櫃枱辦理登記手續，先到先揀位，觀眾也可選擇退回款項，但購買boxset的觀眾則不予退票，只可換取400元的門票，至於新場地個唱尚餘座位會作公開發售，屆時或許不止演兩場。陳太說：「我哋一路想喺香港做巡迴終點站，想遲啲先公佈，𠵱家要提早公佈。」
歌迷鼓譟
「今朝打嚟又話做到」
雖然學友昨午已宣佈取消個唱，但昨晚仍有不少人到紅館準備睇騷，看見紅館外貼了取消通告，部份來自內地的觀眾鼓譟不滿，見有警察在場還聲言要報警求助，有人怒罵：「今朝11點打嚟又話做到，兩點再打又話做到，嚟到先話做唔到，個查詢電話由朝到晚都打唔到。」
此外，陳淑芬昨早接受商台節目訪問，仍表示希望昨晚能如期開騷，她又說：「我哋會同北京商量，北京9月30號嗰場已經爆咗，我哋商量睇吓可唔可以喺10月1號國慶日加場，如果加得成，而內地觀眾又想喺內地睇番呢場騷，我哋會安排。」
採訪：胡比、卓寶花
攝影：陳俊強
話你知：補唱場館「唔存在」
學友昨日發表聲明，宣佈於明年1月在香港戶外場地西九龍PopTVArena補辦兩場演唱會，但其實該場地目前仍未興建，現址為西九龍露天汽車影院「維港巨幕」（圖），位於尖沙嘴柯士甸道西，整個影院佔地約20萬平方呎，十分開揚。據陳淑芬稱，該址稍後會改建成戶外表演場館，並加建一些座位，場地最多可容納25,000人，並可在現場放煙花。
娛樂資料庫：兩度抱病腰斬演出
張學友其實已非首次腰斬演出，早於97年4月在香港紅館上演《雪狼湖》音樂劇時，他也曾因扁桃腺發炎聲沙而腰斬表演，並於翌日帶病登場時向觀眾交代病情。前年12月，學友在台北小巨蛋舉行首場音樂劇《雪狼湖》時，也因患上重感冒致聲音沙啞，結果演出至三分之二時，面容憔悴、力有不逮的學友突然宣佈暫停演出，並帶領所有演員鞠躬道歉（圖）。有指主辦單位當晚至少損失約20多萬港元，其後再補演一場。
全城熱話：群星力撐 外地歌迷慘
張學友臨時取消兩場演唱會，令不少早已買飛的歌迷失望而回，但大家仍對他的健康十分關心。
陳奕迅（圖）：哎呀，我本來今晚（即昨晚）去睇，不過身體最緊要，冇乜人有意見，大家都明白學友，若果我遇到同樣情況，喺好嚴重情況下都會決定取消，寧願唔好影響往後演出。
鄭伊健（圖）：佢好專業，佢都唔想咁，壓力都會好大。就算取消都應該，佢都係保障消費者着想。
古巨基：希望學友快啲好返，聲線上冇乜太嚴重問題啦，其實佢之前做咗50幾場巡迴，把聲算好有韌力。我同公司都冇收過佢哋叫我畀期佢哋嘅聯絡。
加拿大歌迷Teresa：我當然希望學友身體好啦，佢一向唔會交行貨，會盡力演出留個好印象畀大家，唱得唔好俾人批評仲衰。
虎門歌迷胡小姐：有冇搞錯，我哋十幾人喺虎門特登嚟睇，佢話唔做就唔做，我哋要簽證㗎，簽證都到期啦，咁點換飛？真係要報警呀。
香港歌迷陳小姐：我同6個朋友嚟博一博，睇有冇得睇，冇都冇所謂，唔通走晒音都照聽咩？我未知換唔換飛呀，要睇番時間去唔去到睇。
新加坡歌迷Jennifer：我已經睇咗7場，噚晚同今晚都有買飛，一定唔會退飛，情願留番張飛做紀念，𠵱家學友休息最緊要。
