足球是我的生命，女人亦然，食色性也。將我踢出歐聯名單，文仙尼以為我驚到隨處便溺，甚至卑躬屈膝講對唔住，但唔好意思，IamwhatIam！我唔會犧牲兩者之一。文生噚日為我發表公開聲明，睇見佢一邊俾班巨星頂撞，一邊受會長莫拉堤氣，嘻嘻，真戥佢閉翳！
傳媒話我荒淫無度，我頂多承認係浪漫不羈。人生得意須盡歡，呢個性格同我童年經歷有關。我細個住貧民窟，食唔飽着唔暖，個個細路拎住支槍周街行，日日見到有人命喪街頭；呢啲日子我都捱過，試問我仲有乜可以輸？再者，我老竇40幾歲未來得切享福就魂斷巴西，人生脆弱，我唔想行佢條舊路。
「鼻大唇粗似怪獸有罪？」
初到國米，有人睇得起我咩？連嗰個唔識用腳踢波嘅哈根蘇古、似跑手多過似足球員嘅卡隆都有份落場，偏偏借我去帕爾馬？唔通鼻大唇粗似怪獸有罪？文生若非打我入冷宮，我狀態就唔會跌；狀態唔跌，就唔會踢得少，踢得越少就越冇狀態……佢，必定唔記得自己當年都係壞孩子！
薛高推薦我入法林明高嘅恩情，我一生難忘，我哋張合照仲喺相簿，文生，你唔鍾意我？大可送我去土耳其跟薛高，咪當我係「政治人球」！去韋斯咸或帕爾馬？倒不如掛靴。
平日唔會同隊友傾心事，查實我內心嘅自卑又幾多人體會到？咪睇我大大份，我心靈同一般都市人一樣脆如薯片，就此絕筆。文：阿呢斯奧