泰國A嘅二千金喺美國Emory大學讀pre-med（醫科預備），今年畢業後，考到WakeForest讀醫科，但暫緩一年入學，今年跟一位教授做一個研究項目先。數吓手指，A千金十八歲去美國，廿二歲畢業，廿三歲讀成醫科，預期七年後做醫生，已經三十歲，喺美國做醫生，真係路途遙遠，少啲韌力都唔掂，讀書人要留在大學十年起碼；父親亦要有韌力財力，搵夠錢去支持女兒至得。有朋友話泰國A位千金讀嘅學校，在香港、泰國冇乜人識，做醫生蝕底啲喎，香港人講求名校吖嘛。此乃有眼不識泰山，根據新鮮滾熱辣嘅「美國新聞及世界報導」大學排名榜二○○八，Emory大學（位於亞特蘭大）排名第十七，威過排第二十一嘅柏克萊，而WakeForest排名第三十，一啲都唔輸蝕。論WakeForest最知名嘅校友，肯定就係NBA馬刺隊大球星TimDuncan，即將與布殊千金在白宮結婚嗰位幸運男士HenryHager，據報道亦係WakeForest畢業生。
A千金他日得到美國醫生牌，限於醫生保護主義不能回港行醫，泰國A都預咗個女長期居美不回嘅嘞。香港醫科制度跟隨英國，中學讀完可直入醫學院，而美國醫科生一定要有咗大學學位先，美國法律科亦如是。十四歲學生何凱琳人在香港，跟隨英國制度，直入醫學院，係人之常情，最理想嘅訓練個人心智方法係先去美國讀大學四年，十八歲返嚟讀醫科，二十三歲畢業。不過話就易啫，唔係個個家庭都有如此財力耐力嚟支持位學生嘅。
美國律師、醫生讀大學，平均比英國律師、醫生讀多三年書，咁美國律師醫生係唔係比英國律師醫生叻啲呢？唔敢講，要用家先至知道，但以一般法治、醫療水平而論，唔見得英國輸畀美國噃，香港喺呢方面嚟講，在亞洲數一數二，亦唔失禮。先進如日本，唔會叻得過香港。