"WhenIfindmyselfintimesoftrouble,EmileHeskeycomestome"我求大俠唔知英格蘭領隊麥卡倫鍾唔鍾意唱「披頭四」（TheBeatles）嘅歌，但就肯定係個懷舊嘅人，事關佢重召希斯基後，準備用佢同奧雲重組N年前已拍檔嘅攻擊組合撼以色列同俄羅斯！講得好聽係懷舊，實際上證明英軍冇大將，至怕最後出唔到線，要唱"letitbe,letitbe……"。
希斯基拍奧雲仲得？
希斯基首次代表英軍出戰，係99年6月對匈牙利，而佢首次喺國家隊同奧雲拍檔，係同年10月鬥比利時，𠵱家計差不多係8年前嘅事；話就話兩個成名早，家陣仲係當打，但無論喺國家隊（包括2000年歐國盃、02年世界盃決賽周）或利物浦合作過咁多年，真係咩路數都俾人睇晒。再講，如果佢兩個仲得，當年都唔會拆檔啦。
冇人可選焗揀老鬼
我求大俠一邊聽麥卡倫呢個中坑唱舊歌，其實都幾同情佢，事關朗尼養傷、高治對以色列坐波監，而其他位置嘅碧咸養傷、林柏特亦有傷多數唔踢得，總之一大籮傷兵；再加埋近績麻麻，要換班，於是占士、菲臘尼維利等呢啲上個世紀末已入選國家隊嘅球員都入選，又真係揀無可揀。唔通真係靠啱啱補選嘅尼史葛咩?
據聞麥卡倫準備押重注喺希斯基身上，睇佢開季後都係為韋根入過1球咁大把，怕且英格蘭躉都唔旨意佢數糊，望就望佢可以為奧雲佬（仲叫奧雲仔，恕我嗌唔出）開山劈石，咁就已經功德無量咯。