股市大升大跌。八月十六、十七日，股民喊到唔出得聲。八月三十一日，股民笑到四萬咁口，因為半個月之間，恒生指數從低位反彈五千點，升咗兩成有多，令到所有人目瞪口呆，啲分析師冚扮爛唔識睇。𠵱家炒股，使乜講分析，講走勢，講盈利前景吖，總之有消息就掂過碌蔗；今天講吓北水南調啫，中銀監仲未正式批核，香港已經癲晒，有北方線路者發到唔清唔楚；他日北水正式上演一幕「關雲祥水淹七軍」之時，香港恒指會炒上三萬五千點？
《文匯報》轉述中國銀河證券首席經濟學家左曉蕾一篇文章話，「港股直通車是福是禍，難說得很，A股股價與H股股價的差異是泡沫，不是價值，內地暴富股民來港低買H股的話，會將港股變成第二個A股市場。香港投資者本來不認同A股的價值，但內地港股直通車啓動後，兩個市場有可能混合為一。」
左曉蕾嘅分析好理性，可惜吖，市場有時不需要理性。現在係消息市，人人炒消息，假作真時真亦假。老友股民T炒股多年，愈炒愈驚，八月二十幾號就一路出貨，結果一路俾T師奶話冇膽。T師奶係近一年先至學買股票嘅，睇報紙推介，一早買咗中海外（688）、中海集運（2866），買咗就唔賣，𠵱家賺到笑。最近問吓價，八月三十日見到中海集運大跌，大驚之下，即刻捉住股民T追問：「老公，點解中海集運股價會唔見咗咁多！」股民T仰天長嘆：「派紅股呀，每一股派0.55股，八月二十九號除淨，識唔識呀？股價咪反映番囉。」T師奶話：「咁又即係平咗啫，應該買多啲，一返回原價，我會賺到笑！」股民T唯有熄電腦，返房攬着枕頭瞓晏覺。
T師奶覺得呢排電腦上銀行網好慢，與幾位師奶一齊殺上海富中心一間老牌經紀行開多一個戶口，點知經紀行內人山人海，夥計只係派籌啫，唔係開戶口。T師奶問：「我哋去香格里拉飲杯茶先，返嚟輪到未呀？」夥計答：「對唔住，我哋派第三日籌，你哋請喺三日後再嚟！」T師奶打電話向老公報告，股民T立即再出貨。