資優兒童鬧得熱烘烘，執輸行頭慘過敗家嘅香港人，叫何來這種教女方式為「另類母愛」。或者你覺得這個天星、皇后戰士好激，留守天星，最後被判120小時社會服務令；但她認為這才是以身作則的正確榜樣，讓女兒看到甚麼是對錯。而9歲的小女兒Riva，欣賞媽媽給她的選擇嗎？原來在Riva眼中，這個堅持只不過是一個遊戲。我們本來想找個專家去分析何來的教仔方法，但訪問後，知道沒有這樣的需要，因為Riva已做了最好的分析：何來的女兒仍太細，未能感受到媽媽的訊息，但她享受過一個很獨特的童年遊戲，面對保育抗議，何來女兒從不放在心，但人生經驗比別人多。
記者︰劉昱蘭
攝影︰陳盛臣
保衞碼頭……因為好玩
記者︰ 點解同媽咪一齊去天星靜坐？
Riva︰ 係媽咪要帶埋我去嘅……
記者︰ 咁你最後都留低一齊坐，一定有啲嘢吸引你嘅。
Riva︰ 其實我成日溜咗去大會堂食嘢、圖書館睇書……不過爬上碼頭頂幾好玩，仲可以喺上面瞓覺、玩吓踏板，有得玩，都幾得意。
記者︰ 喺電視新聞度睇番媽咪咁激，有乜感覺呀？
Riva︰ 冇喎，屋企都冇電視嘅，不過我鍾意睇HighSchoolMusical。
（媽咪插嘴︰佢以前試過睇《還珠格格》睇到食飯定晒型，我就從此Cut咗部電視。）
記者︰ 媽咪為你好，又無電視，又住到大嶼山咁遠，你想唔想住吓市區方便啲呀？
Riva︰ No……市區空氣咁污染有乜好喎。我試過響朋友九龍嘅屋企住咗6日，真係唔鍾意。
記者︰ 你以前都讀過一年中文學校㗎喎，後來轉番去國際學校讀，有冇覺得中文學校有啲好嘅地方會掛住㗎？
Riva︰（吐舌頭扮吊頸狀）我唔會掛住嗰度……我淨係記得校長好好人。
記者︰ 校長有乜好呀？
Riva︰ 都唔記得有乜好喇……
記者︰ 媽咪唔鍾意買禮物獎勵你，有時你會唔會都想媽咪獎吓你㗎？
Riva︰ 都想㗎……有一次我游水游到20米，好想媽咪送粒糖畀我食。
記者︰ 媽咪有時會嬲得滯打痛咗你，你會唔會嬲媽咪3日3夜？
Riva︰ 都唔會嘅，媽咪會同我講番件事邊個唔啱，同埋會講Sorry㗎。
何來5大抗議
反對囗 買禮物獎罰？
「有個升中四嘅男仔喺網上Forum鬧阿媽係賤人，因為細妹成績進步，媽咪送部NDS畀佢，但自己升到班，媽咪覺得佢無盡力，升班只靠運氣，決定唔送，10多年親情就俾部PSP代替咗。」
何來最憎呢種獎罰模式︰「咁樣嘅獎勵，太似僱員關係嘅交易，將感情變作禮物，成為一種有形交易，太容易被取代，仔女以為養育之恩可以Trade番嚟，交易完都唔使講尊重，根本唔明白父母畀咗關愛佢。」
反對囗 體罰有害？
何來會打，但會打得有道理，打完會傾番成件事邊個啱邊個唔着。
「記得媽咪試過用3條木條打我手，但嗰次係因為我無講低聲會去邊度，就唔見咗人，我明白係過咗底線，媽咪先會咁嬲。」打過痛過後要解釋，唔係乜都打一餐。
反對囗 取綜援係恥辱？
有啲嘢失去咗真係補唔番，喺囡囡最初嗰3年，何來全心全意畀晒所有時間照顧佢。「畀一種安全感佢，對佢嚟講絕對緊要，頭嗰幾年取綜援過活都唔係問題，無時無刻喺佢身邊，帶佢認識世界，錯過咗呢段黃金時期，真係一世都補唔番。」
「安全感唔係教番嚟，係要用身心去畀佢，頭幾年畀佢建立到對世界、對生活嘅安全感，對佢性格都好大影響，佢唔會咁有攻擊性，唔會咁易同人對立。」何來心目中，純良是來自一種安全感。
反對囗 好忙呀，所以請工人？
何來反對請工人，不過都好明白香港人生活咁迫人，請工人都無可厚非，但絕對唔可以乜責任都畀晒工人，工人可以輔助處理外在生活條件，但始終教育孩子內在品質，還是落在父母身上。
「屋企，小朋友都有份，最怕小朋友有工人使，當正自己係大少爺，以為只負責玩，家務就同佢絕緣，有時仲開口埋口罵工人。
好多時係因為小朋友見到父母對工人唔尊重，所以一定要身教，主動同工人分擔適量嘅工作，尊重工人私隱，你都想工人係幫到屋企，唔係搞到小朋友變成難教小霸王。」
反對囗 單親係問題家庭？
單親家庭只係辛苦啲，但何來絕對唔覺得要人可憐，反而有時覺得雙親家庭更大問題。「多人家庭太複雜，小朋友要花好多時間學習配合家庭成員，着重人際關係嘅溝通，自然少咗時間建立自己，𠵱家屋企兩個人簡簡單單，全部時間都係單對單對談，唔使搞關係，了解小朋友多咗，大家成為彼此生活上最密切嘅Partner。」
「我唔會俾我嘅小朋友6、7歲前學寫字，佢咁細個身體協調機能都未成熟，太早訓練手部肌肉，對腦部發展唔好，咁樣對小朋友嚟講太暴力喇。」
香港電台何來專訪
日期︰9月5日（星期三）
時間︰7:00pm
電視頻道︰無綫翡翠台
網上直播及重溫︰ http://tv.rthk.org.hk