數碼達人：鏡面Porsche手機瞬間即拍<br>型男：「你逃得掉嗎？」

數碼達人：鏡面Porsche手機瞬間即拍
型男：「你逃得掉嗎？」

型，由信心出發，即使身材又肥又矮，但只要坐上一架黑色開篷波子跑車，魅力便由此而生！作價170萬，當埋條底褲都買唔起？唔緊要，PORSCHEDESIGN已為年輕潮人訂做咗一部以保時捷為名嘅手機──P'9521，盛惠$13,980！

記者：陳國輝　
攝影：陳陶鈞　
Model：Lo、Tiffany

防撞抗花　鋁磚礦物合成

過萬元手機有VERTU，無論機身抑或鍵盤，均鑲嵌寶石和18K黃金，價值不菲。P'9521機身並沒有豪華鑽飾，相反，外觀力求保持跑車般簡約而實淨嘅設計。揀選銀、黑色調，外殼由鋁磚壓製，特別耐用；甚至屏幕，更用上礦物玻璃製造，唔易碎裂刮花。拎上手只感受到冰冷，但機殼邊位就稍為鋒利，小心𠝹親手㗎！

■無縫式鍵盤設計，跟跑車嘅開篷造型相映成趣。

■屏幕可180度轉，現時最流行設計。

■提供USB，可與電腦資料同步。

指紋驗證　翻屏對焦即拍

萬元手機又怎會只求靚、玩噱頭，P'9521最特別係屏幕下設有指紋驗證器，結合法國Sagem技術，手機能記錄10隻手指指紋，用於開機、電話簿、相片簿或者短訊保安都冇問題。最難得係，機背配置320萬像素相機連雙閃燈，只要將屏幕180度翻轉，玩家即可利用指紋驗證器嚟操控DC，只要向上、向下、向左或向右掃過去，就可完成微距、白平衡、選擇解像等分唇。但要記住，喺揭蓋或手機蓋合上嘅情況下，DC功能就無法啓動，咁玩法方唔方便，真係見仁見智。