《蘋果》體育版喺八月二十三日刊載兩段消息，幾趣致。一段係AC米蘭變成老人「樂園」，另一段係「蘇斯達難馴皇牛」。對照嚟睇，幾有教育性，行政管理人員不可不知，可從中吸收養料。
AC陣容，特多老兵，平均年齡係29.6歲，最大嗰位係鐵閘馬甸尼，三十九歲，巴西大牌朗拿度已算比較年青，三十歲。踢足球講求年青力壯，阿仙奴有一個政策，就係三十歲嘅球員冇碇企，連二十九歲嘅亨利大帝都要賣走，阿仙奴中場大腦係只有二十歲嘅法比加斯。不過講番近季成績，AC班老兵好好啫，今年五月得歐冠盃冠軍，踢低利物浦，係一個大成就。反而阿仙奴從未攞過歐聯冠軍，連續兩屆在英超得梗頸四，成績認真麻麻。
AC老細貝魯斯科尼曾做意大利總理，傳媒大亨，成日畀人鬧，但此君厚待「忠臣」，好少炒領隊魷魚，更加唔會主動踢走佢心目中認為夠實力，夠忠誠嘅球員。效力AC二十三年嘅馬甸尼兩代在AC踢波，父親Cesare二十一年前已經係AC球員與職員，馬甸尼個仔Christian，今年十二歲，已加入AC做學徒，有可能十年後成為AC主要球員。
老兵又點啫，AC在歐洲縱橫多年，攞歐冠盃次數僅次於皇馬。皇馬就唔同嘞，差唔多每年換一次領隊，成績曳，炒梗；攞到西班牙聯賽冠軍嘅卡比路，一樣係一年貨色，畀皇馬賠錢趕走，請咗前德國球星蘇斯達做領隊，都未開鑼啫，已有聲氣傳出話要炒佢，令人唔明白，皇馬嘅董事會，知唔知道loyalty係雙向嘅，如斯短視，點樣能夠做好管理？要知道，皇馬攞歐洲冠軍次數最多係在五、六十年代有史蒂芬奴、潑斯卡斯、珍圖三大球星嘅穩定時期，七十年代至今，未認真威過。一間球會對領隊、球員忠誠、長情如AC者，得到嘅回報，比起成日貪新厭舊，鍾意年輕嘅球會高好多。貝魯斯科尼係意大利傳媒大王，事業十分成功，睇佢領導AC嘅作風，相信佢嘅媒體亦養埋唔少老編輯、老記者。