少不更事，容易迷失，夏韶聲也曾經歷過。被喻為香港搖滾之父的他，曾抱着人試我試心態吸食大麻，滿以為毒品能把自己搖滾音樂提升到更高境界，但到頭來發現毒品只會弄壞聲帶，他根本毋須借助毒品已經能夠做到naturalhigh；更重要的是，夏韶聲五個兄長相繼離世，母親一句：「你自己好好哋啦！」足以叫他自愛自律生活下去。 撰文：戴彩煥
足足七年沒踏足紅館的夏韶聲，將於本月15、16日在紅館開騷，今次開騷目的，夏韶聲無非想告訴全世界他「仲得」，他說：「我之前出嘅《諳》大碟係好賣，但好多人以為我唱歌放輕咗，冇以前咁rock，其實唔係我唔得，只係到某一個年紀去做某個年紀嘅嘢，我今次就係想攞番我搖滾之父個位。」
聞膠更墮落
搖滾樂歌手經常被指要借助吸毒來達致最high境界，夏韶聲認為只是錯覺：「我𡃁仔時都試過食大麻，全個酒吧嘅人個個都食，呢樣嘢喺我哋個年代，好似煙草咁普遍，初初食好似幾過癮，睇嘢又開心，但我之後已經可以naturalhigh，根本唔需要靠呢啲嘢。嗰陣時唔單止大麻，有啲人淨係OK膠都聞餐死，我睇見都覺得好墮落。
「記得以前有歌手問過我，錄音係咪需要食大麻先，其實啱啱相反，食咗之後你反而唱唔到，因為會漿住你個喉嚨，聲底好易壞。我根本唔好呢樣嘢，雖然細個時阿媽冇乜點教，因為佢都唔係好知呢樣係乜，但佢會話畀我知：『你幾個大佬已經唔喺度（五位兄長先後死於戰亂及饑荒），我得番你一個仔，你自己好好哋啦！』呢個好好哋，咪變成自己self-discipline囉！我真係冇乜點俾人引誘到，如果我要壞，𠵱家已經變咗社團大冧把啦。」
對獎項死心
85年，夏韶聲演繹《空櫈》獲得第一屆亞太流行歌曲創作大賽（ABU）冠軍，他過往演出的夜店卻認為《空櫈》這歌名不好意頭，拒絕再跟他續約，害他失業8個月，但最令夏韶聲不甘心的，並非夜店不再請他，而是年尾樂壇頒獎禮連一個豬肉獎也不肯給他，他說：「當年ABU係林敏怡同林振強攞獎，呢首歌咁有代表性，我以為年尾應該會畀番啲嘢我，結果一個都冇，所以自此以後我對獎項都不聞不問。」
《空櫈》是夏韶聲的經典，也是盧大偉的經典，當年他在《歡樂今宵》唱的《凶櫈》，連夏韶聲也拍案叫絕：「我自己都有錄低，盒帶仲喺度，首歌唔紅，人哋都唔會改，所以我一啲都唔會介意！」
不介意盧大偉唱《凶櫈》，但介意他經常拍膊頭叫自己捱義氣，夏韶聲說：「佢成日接騷（做搞手），但冇一個騷我係做得成，因為佢次次同我講budget唔夠，我有次真係好嬲咁同佢講：『點解budget唔夠你就諗起搵我做？點解有budget嗰陣你唔諗起我？』自此以後佢冇搵我，佢知道撞板啦！我可以同你做四次五次，但唔可以永遠都係咁，所以嗰個年代人哋以為我難相處，其實我係俾人恰得好緊要。」
得愛妻鼓勵
儘管在圈中人眼中的夏韶聲難相處、儘管他因為音樂事業陷於低潮，要到電視台跑龍套搵兩餐，但他那班來自五湖四海的die-hardfans對他依然不離不棄，令夏韶聲又感動又榮幸，他說：「以前喺夜總會同酒店唱歌，乜嘢層面歌迷都有，有嚟香港做嘢嘅FBI，有啲以前喺社團做𡃁仔，今日做咗大佬；當年做警察，今日係退休警司，當年係大學生、今日俾美國CIA請去做驗槍。」
夏韶聲說：「以前做𡃁仔時嚟捧場嗰啲，今日好多已經上晒位，就算你老細（黎智英）都係！我同林振強係好朋友，《空櫈》之後我失業，成日同林振強呻，後嚟黎生搵林振強約我出嚟食日本菜，同我講咗好多嘢，佢話：『你係得㗎，使乜灰心？』簡單一句說話，對我嚟講已經係一個鼓勵。」
歌迷加上第四任太太Tina的支持鼓勵，是夏韶聲今次要做好演唱會的原動力。雖然今日歌手舉行演唱會時，每每在服裝、佈景上挖空心思，但夏韶聲表示他已經代表了好音樂，不需要再靠其他東西來堆砌，他說：「如果有日大家見到我喺台上玩飛刀噴火，咁即係代表我唔掂。」
人物誌：藝名大有來頭
現年53歲、有香港搖滾之父之稱的夏韶聲68年開始夾band，79年推出第一張大碟《童年時》即獲最有前途歌星獎。83年因緣際會下加入日本首席搖滾樂隊Creation巡迴日本表演，藝名DannySummer就是Creation揸弗人、日本享負盛名的結他大師竹田和夫為他改的。
至於為夏韶聲帶來首個事業高峯的是他首本名曲《空櫈》，由林敏怡和林振強炮製，更奪得85年「亞太流行曲創作比賽」冠軍。90年代轉投電視發展，98年重返樂壇推出大碟《諳》叫好叫座，其後數年再推出同樣好賣的《諳2》及《諳3》。
