美國大熱劇集《靚太唔易做》（DesperateHousewives）唔經唔覺播到第四季，美國廣播公司（ABC）最近發咗最新靚相嚟谷宣傳。阿Deep發覺大部份都過「四張」嘅靚太，喺佢哋影嘅新相度個個變成塑膠人，難怪fans大彈五位加埋近200歲嘅阿太仲假過卡通。
「假到作嘔」
記得《靚太》喺04年啓播時，ABCsell呢套劇係講五個徐娘半老嘅師奶，當時佢哋嘅打扮非常生活化，正如活生生五個師奶。去到第二季，五位靚太已經有明顯改變，喺輯瞓喺蘋果上面嘅相，都突出佢哋性感嘅一面，伊娃隆歌莉亞（EvaLongoria）同菲莉絲蒂夏夫曼（FelicityHuffman）嘅乳溝，已經畫得好假。
去到第三季，五位靚太突然返老還童變番少女身，皮光肉滑之餘，個個身材弗到漏油。喺啱啱發表嘅第四季宣傳相中就更離譜，個個塊面「令」到發光之餘，明顯眼耳口鼻都俾人執正埋，認真不可思議。網友見到最新宣傳照後，個個笑到停唔到口，其中嚟自倫敦嘅Mandy話：「荒謬！佢哋同卡通人冇分別。」來自伯明翰嘅Kathy都話：「佢哋假到令人作嘔！」
網址：
http://www.dailymail.co.uk/pages/live/articles/showbiz/showbiznews.html?in_article_id=478970
版主：網盜王尊尼Deep
本欄逢周一至五刊出