娛樂圈，是非圈。
是非某程度上可令藝人火速上位，不過，一旦過了火位，即會令藝人建立的形象瞬間化為灰燼，葉璇正是一個活生生例子。過去一年葉璇刻意低調洗底，為了賺錢生活，不時返內地登台，淪為「奀騷之星」。
是非纏身的葉璇最近接拍有線劇集時，生人勿近，被同劇演員梁思浩和陳雅倫杯葛。她依然我行我素，並高傲的說：「我唔會介意唔認識嘅人點睇，其實好多藝人都試過俾人寫衰，咁咪通行啲人都要自殺？」倔強的她自信心爆棚，堅信自己選美出身、對演戲又有熱誠，可於圈中屹立不倒。 採訪：比華利
葉璇去年雖然新聞多多，繼續衞冕「新聞女王」寶座，可是當中盡是負面新聞，先有被指給緋聞男友「殼王」陳國強飛甩，再被爆欺負前女助手，形象大插水，有指經理人為了替她全面洗底，過去的大半年安排她低調北上發展，遠離香港媒體，斬腳趾避沙蟲。
片場內外同遭杯葛
葉璇早前接拍了有線娛樂台劇集《補習天后》後，與是非元老陳雅倫、梁思浩等過招，立即又颳起高達十級的強烈是非旋風，風眼主要因為葉璇扮大牌引起，遭其他演員孤立杯葛，片場內外，大家惟獨與她零交流，葉璇離群做獨孤精。
對於被指犯眾憎的種種指摘，早有備而來的葉璇說：「邊個話我同佢哋夾唔嚟，全部係記者話啫，我哋不知幾friend，相處冇問題。」
「唔傾偈就話不和」
傳媒多次探班都拍到梁思浩與董敏莉談笑風生，反而葉璇就獨坐一旁發呆，葉璇說：「可能因為我同思浩戲份唔多先有誤會，其實片場裏邊，思浩成日請我食零食，我哋私下都會約埋食飯同飲嘢。」葉璇指傳媒只是看圖作文，還反駁說：「唔傾偈就話不和，傾偈又話我同人扮friend，真係唔通話我同思浩傳緋聞咩？」又大賣口乖讚他說：「思浩為人聰明，反應快。」
《補》劇中麻煩兩后葉璇和陳雅倫，早前宣傳已鬥性感鬥搶鏡，最近有報道指拍戲期間，二人鏡頭前雞啄唔斷，鏡頭後即背對背，擘晒面。
葉璇卻形容與一辣就㷫的陳雅倫關係密切，她說：「佢（陳雅倫）好錫我，佢知我喺香港冇親人，平時冇湯水飲，有時佢帶咗阿媽煲嘅靚湯返嚟，都主動請我飲，我早排仲幫佢訂機票，大家禮尚往來。」從前氣燄囂張的葉璇，直話直說，但她卻自稱與陳雅倫相處融洽，唱好對方，莫非她們是物以類聚？
助手職責處理衣物
葉璇又指是非是接拍電視劇的附加「贈品」，她說：「次次拍劇就好多新聞，拍完就自然靜落嚟，𠵱家啲新聞唔係緋聞，就係是非，我對呢啲新聞都冇感覺，我從來唔睇，又唔會刻意去澄清，我覺得冇必要。邊有可能同其他藝人24小時一齊，總會俾人講，我同人傾偈，之前雜誌又話我『友誼小姐』上身，我以前參選，佳麗之間都互選過友誼小姐，通常獲獎嘅佳麗都係冇乜殺傷力。」
葉璇大幽自己一默，然後又說：「我唔會為呢啲九唔搭八嘅新聞唔開心，只會一笑置之，我嘅職業係一名演員，我只會做好自己嘅演出，其實好多藝人都試過俾人寫衰，咁咪通行啲人都要自殺？」
藝人向來講究形象，健康形象其實也是生財工具，可以帶來源源不絕的工作量，葉璇去年被前女助手爆料指受到辱罵和精神虐待，最近又被拍到要男助手在外景場地眾目睽睽下當眾挽鞋，她否認這樣做對助手的態度過於苛刻：「我冇對前助手唔好，我亦冇迫男助手挽鞋，助手職責有時係需要幫藝人處理衣服物品。」
形象跌至谷底的葉璇又怎看自己？我行我素的她說：「藝人都應有自己嘅私生活，不過我覺得唔需要為一啲扭曲咗嘅花邊新聞咁執着，我唔會介意唔認識嘅人點睇，最重要係喺認識我嘅朋友心中嘅形象，要我花精神喺呢啲八卦新聞上，真係唔值得。」
內地做騷唔算Cheap
長江後浪推前浪，葉璇認為自己可屹立娛樂圈的賣點是甚麼？她自信的說：「女仔都深信自己樣靚身材正，我係選美出身，都符合一定標準，自己評自己，我會覺得順眼囉，至於自己可以喺呢行嘅生存空間，係我對做戲仍好有熱誠。」葉璇稍後的工作有待經理人的安排，她無怨早前頻頻往返內地做奀騷，她說：「經理人安排得畀我做嘅，我都對佢哋有信心，況且傳媒都係估我嘅酬金啫，又點可以話做cheap騷？」
攝影：林德雄
髮型：PatrickSo
化妝：HeidiChun
服裝：BCBGMaxAzria
唔識殼王彤叔齋食飯
過去經常與葉璇並排見報的異性，最為人留下深刻印象，非契爺鄭裕彤和已婚的「殼王」陳國強莫屬。葉璇05年底被周刊拍到與殼王在內地夜店大跳辣身舞。有指她因為刻意借緋聞上位，最終甩殼失寵，去年參與電影《至尊無賴》被投閒置散，淪為閒角。問到葉璇可仍有與殼王聯絡？她死撐：「我都唔識佢。」看來她已忘記了當日磨爆殼王，鐵證如山的照片。
葉璇封口不談殼王，當話題轉到契爺彤叔身上，態度忽然逆轉，她答道：「有時都會一齊食吓飯。」對於早前彤叔旗下新世界集團的店舖備受滋擾，她表示有送上問候，有線娛樂台新劇《補習天后》明晚首播，可會要彤叔捧場，她說：「都會嘅。」
女人可自強
女藝人的感情世界，充滿娛樂性，到底緋聞從未間斷的葉璇，她最新感情狀況又如何？葉璇說：「女仔身邊總會有人追，梗係有男仔朋友啦！」
現年27歲的葉璇指自己暫時緣份未到，她說：「𠵱家嘅女仔好自強，我唔係一個恨嫁嘅人，我細個喺內地長大，接受共產黨教育，男女平等，我覺得一個女仔都可以自強自立。」
同情姣精陳法拉
葉璇選美出道，一直備受娘家無綫力捧，曾在多套劇集中擔正，可是每次總惹上戲假情真的緋聞，電力非常強勁的她更先後被指搭上陳浩民、林峯和吳卓羲等，緋聞男友名字一大堆，雖然無承認過到底誰是真命天子，但watt數凌厲的她已被冠上超級「姣精」封號，男人勿近。
「靚女兼條件好」
葉璇05年約滿無綫，跳槽林建岳旗下的紅館經理人公司，決心向影壇發展。當紮花旦、同是華裔小姐出身的小師妹陳法拉立即繼承了葉璇的發電廠，近期先後向黃宗澤、陳豪發功，同樣因為緋聞多多，承接姣名成為「姣精二世」。可能感同身受，葉璇十分同情陳法拉，她說：「我都有留意佢（陳法拉），因為大家都係喺外國返嚟香港發展，佢又靚女，條件又好，前途無可限量，用個『姣』字去label咗佢，因為呢個字充滿貶意，太過嘩眾取寵。」
