看通（1059）上星期五一支箭升咁近20%，阿媽冠軍（092）升得7%，兩隻股同樣抵買，但博落後，就要買冠軍。冠軍家陣揸住看通51%權益，阿仔賺錢，阿媽受惠，冠軍已經有母憑子貴因素。但由03年牛市到家陣，阿仔看通升咗27倍，阿媽冠軍同期只係升得72%，大落後。
又冠軍同阿仔看通兩隻股嘅優質基本因素幾乎一個餅印：07年度（6月底止）預期PE，同樣企喺5倍樓下單位數，息率挨近4厘，阿媽冠軍，兼且仲有60%NAV折讓（看通無折讓），講P/B，冠軍仲吸引過看通。再講，冠軍今年踏入集團20周年慶典，博07年度派成績表之時，會有甜品送，合情合理。呢轉博冠軍炒落後，翻一番見3.28元。
滙漢可攻可守
對上兩個星期，建議睇位博金朝陽（878），金朝陽到家陣升咗36%，呢轉博滙漢（214）。
滙漢連供股同資產重秤嘅因素一併計數，NAV5.8元，現價（1.62元）折讓上到72%。港股若然企喺03、04年低位，滙漢有咁嘅折讓，一啲唔出奇。但家陣港股大時代，再創新高，滙漢仲有咁大折讓，誇張得嚟，又真係好吸引。再講，滙漢手頭淨現金上到3.5億銀，銀彈多，進可攻，退可守。博滙漢升番上6月高位兩蚊雞，回報率23%，有魚有肉。
錢雋