上市公司出現董事大換班，根據一貫經驗，都唔慌好嘢。華華上個禮拜見到安歷士（723）嘅董事變動通告，內容係咁嘅，鄭子傑、楊志達、林國昌喺股東周年大會退任後唔再連任；候任董事廖金龍又話唔參選；郭漢林、郭致恒更辭任執行董事；仲有周念申亦話辭咗獨立非執董同審核委員會成員嘅職位。
以上咁多位仁兄你可能全部唔識，但數吓手指，一間上市公司6個董事一齊起身唔做，1個未上任已經話唔參選，你係投資者有乜反應？驚？又唔使住。
翻查資料，安歷士本來由郭漢林創辦，做家庭電器製造，可惜近幾年業績唔理想，05年又配股「班水」，集咗850萬銀，跟手又供股集資二千幾萬。捱唔夠一年，舊年5月又要再供股「班水」；不過，今次郭漢林細佬、安歷士主席郭漢青，冇承諾按比例供股，只得大佬硬撐。另一方面，鄭盾尼入股仲坐埋主席位；至於郭漢林做番副主席，佢個大仔郭致恒就做執董。
改朝換代轉營地產
鄭盾尼本身做開酒店同房地產投資，7月正式出通告話會轉型為地產發展商㖭。
講到呢度，大家都應該有啲頭緒，如果華華冇估錯，安歷時係時候改朝換代，舊人亦係時候撤退畀返個場人哋。睇埋港交所大股東增減持資料，郭漢林呢幾個月不斷減持股份，睇怕華華冇估錯。