近年掀起一片集體回憶熱潮，所以三色公仔箱都諗住今年台慶搞吓懷舊，佢哋想搞番個經典綜藝節目，邀請舊時嗰班老臣子返嚟熱鬧吓，好似金牌司儀「花王」就係其中之一。花王離開三色台好多年，移民去外國之後嘅生活又悶到抽筋，所以當三色台高層「大熊貓」搵佢回巢，佢都好有興趣咁即刻答應。
點知「阿傘」收到風之後向大熊貓詐晒型，話如果佢哋搵花王返嚟嘅話，就有佢冇我，事關阿傘當年同花王有過一段好唔愉快嘅感情，花王同阿傘拍緊拖時重四圍搞三搞四，阿傘同佢分手之後，當正佢係仇人，同佢反晒面，試問又點可能同佢同台演出，仲要一齊扮到若無其事咁主持節目？結果大熊貓計過條數之後，發覺搵花王返嚟嘅人工絕對唔平，加上阿傘講明有佢冇我，大熊貓唔想得失阿傘，所以惟有飛起花王唔「侵」佢玩囉！
Textby關仁
