以前，喺銀行打工係好多人嘅夢想，薪高糧準，又準時收工；但今時唔同往日，好多銀行員工工時好似Sales咁長，有網民喺《Uwants》銀行界討論區，提出「幾點收工統計」，唔少同業乘機大吐苦水，仲有網友發起投票，喺「一定唔會做」嘅銀行名單裏面，獅子行滙豐以大比數領先。
銀行業務越嚟越多元化，銀行職員亦都越嚟越多嘢做，喺銀行做嘅ryan1817就話：「最早七點半收工，最夜試過凌晨一點先走得。」嚇親beibeix10，「唔係啩，一點？邊個同你癲？」點知winxpplus話：「最早六點半，最夜試過三點。」
搞新股 帶埋睡袋返工
點解收咁夜？咪係「新股熱」累事囉，ryan1817話喺人人都抽新股嘅時候最甘，「我試過兩三點；隔籬Custody（託管部門）啲人一有IPO，就要帶睡袋返工。」
呢班嚟自銀行界嘅網友仲投票，睇吓喺邊間銀行最「做唔過」？根據投票結果，多數網友都覺得獅子行最多嘢做、最辛苦，要揀「一定唔會做」嘅銀行，有四成幾人揀獅子行。古華多羅上尉話：「我都算係滙豐人，覺得𠵱家嘅滙豐真係越嚟越難做，有得揀，真係唔好入去做。」
http://www.uwants.com/